Asqar Myrzahmetov «Shahrıstan» tarıhı-mádenı kesheniniń qurylysyn synǵa aldy
TARAZ. QazAqparat – Tarazda Jambyl oblysynyń ákimi Asqar Myrzahmetovtyń tóraǵalyǵymen jıyn ótip, onda «Shahrıstan» tarıhı-mádenı kesheniniń qurylys barysy qaraldy, dep habarlaıdy QazAqparat Jambyl oblysy ákimdiginiń baspasóz qyzmetine silteme jasap.
Ondaǵy qurylys jumystaryna jaýapty shtabtyń esebi tyńdalyp, atqarylǵan sharalar jan-jaqty saralandy.
Baspasóz málimetterine qaraǵanda, «Shahrıstan» tarıhı-mádenı kesheni qońyr kúzde toılanýy josparlanǵan oblystyń 80 jyldyq mereıtoıyna deıin tolyǵymen aıaqtalyp, paıdalanýǵa berilip úlgerilýi tıis. Ondaǵy qurylys jumystarynyń búgingi tańdaǵy qarqyny kóńil kóńshitpeıtini jıynda ashyq aıtyldy. Osyǵan asa nazar aýdarǵan aımaq basshysy qurylys jumystaryn jandandyra túsý kerektigin basa aıtty. Ol úshin eki aýysymdyq rejımge negizdelgen jańa jumys kestesi bekitildi. Sol boıynsha merdigerlerdiń jumysy shıratylyp, qarqyny kúsheıtilmek. Alaıda, óńir basshysy ýaqyttan utamyz dep, qurylys sapasyn nazardan tys qaldyrmaý kerektigin qatań eskertti.
Ol ǵana emes, endigi kezekte jumys rejıminiń ózgerýine baılanysty, qurylysqa qajetti materıaldardy ýaqytyly jetkizip otyrý jaıy da sóz boldy. Bul oraıda materıaldardy óndirýshilermen aldyn ala kelisimge kele otyryp, qajetti buıymdardy kúni buryn daıyndatqyzyp qoıýdyń mańyzdylyǵy aıtyldy.
Oblys basshysy bul jumystardy kúndelikti óz baqylaýynda ustaıtynyn jetkizip, tıisti tulǵalarǵa naqty tapsyrmalar júktedi.
Sondaı-aq osy kúni tús qaıta Taraz qalasyndaǵy baǵdarshamdar, jol belgileri, jaryqtandyrý, jol qozǵalysy máseleleri boıynsha jıyn ótti. Onda kún tártibindegi másele boıynsha qala ákimi Qaırat Dosaev baıandama jasady.
Búginde oblys ortalyǵynda barlyǵy 1330 dańǵyl, kóshe, burylys bolsa, onyń 39 paıyzy asfaltbetondy joldar. Qalǵany shaǵal, topyraqty kósheler. Aıta ketý kerek, ótken jyly bul baǵytta 500 mıllıon teńge bólinse, aǵymdaǵy jyly 2,1 mıllıard teńge qarastyrylǵan. Onyń 1 mıllıard teńgesi qalalyq bıýdjetke, 1,1 mıllıard teńgesi oblystyq qazynaǵa tıesili.
Asqar Isabekuly qala ishindegi joldardyń sapasy shyn máninde syn kótermeıtinin ashyq aıtty. Turǵyndar tarapynan da kóterilip otyrǵan basty máselelerdiń biri osy ekenin jetkizip, bul baǵyttaǵy jumystardy kúsheıtip, tıisti kórsetkishti jaqsartý kerektigin tapsyrdy.
Sonymen qatar qaladaǵy orynsyz ornalasqan baǵdarshamdar men jol belgileriniń olqylyqtaryn jipke tizgendeı atap kórsetken óńir basshysy bul máselerdiń buǵan deıin san ret kóterilip, naqty tapsyrmalar berilgenimen, esh nátıje shyqpaǵanyna qynjylys tanytty. Bul máseleler boıynsha jaýapty basshylarǵa sońǵy márte eskertý jasap, on kún ýaqyt berip, tapsyrmalar hattamaǵa engizildi. Ol ǵana emes, basqosýda Taraz qalasynyń ońtústik aınalma jol jáne qaladaǵy jol jóndeý jumystarynyń barysy da keńinen saralandy.
Aımaq basshysy alda oblystyń seksen jyldyq mereıtoıy kele jatqanyn tilge tıek etip, barlyq jumystar oǵan deıin tııanaqty túrde tyndyrylý qajettiligine nazar aýdartty.
