Asqar Myrzahmetov mektep-ınternat tárbıelenýshileriniń tilekterin oryndamaq
TARAZ. QazAqparat – Jambyl oblysynyń ákimi Asqar Myrzahmetov Taraz qalasyndaǵy N.Tilendıev atyndaǵy mektep-ınternatynyń tárbıelenýshilerimen kezdesti, dep habarlaıdy QazAqparat tilshisi.
Aıta keteıik, buǵan deıin atalmysh mektep-ınternattyń tárbıelenýshileri oblys basshysymen kezdeskileri keletinderin aıtyp vıdeo joldaǵan. Ákim balalarmen ýaqyt taýyp, júzdesýge ýáde bergen edi. Aımaq basshysy ýádesinde turyp, kezdesýge bardy.
Asqar Myrzahmetov aldymen mektep-ınternat ǵımaratyn aralap, jaı-kúıimen tanysty. Mekeme dırektory Elmıra Jaqsylyqova bilim ordasynda búginde 390 bala tárbıelenip jatqanyn jetkizip, olardyń qatarynda jartylaı jetim, kópbalaly jáne turmysy tómen otbasylardyń balalary bar ekendigin aıtty. Olarǵa barlyǵy 86 pedagog, tárbıeleýshi bilim berýde.
Óńir basshysy mekeme aýlasyndaǵy jaıaý júrginshiler joly, jataqhanadaǵy tósek oryndaryn jańalaý, ǵımarat ishindegi jaryqtandyrýdy arttyrý máselelerine nazar aýdaryp, qural-jabdyqtardyń jetkilikti, ashananyn talapqa saı bolýyna barynsha kóńil bóldi. Sonymen qatar, mundaı áleýmettik nysandardaǵy túıindi túıtkilderdi sheshý, ondaǵy tárbılenýshiler men qyzmet alýshylarǵa barlyq qolaıly jaǵdaı jasaý - qashanda basty nazarda bolý kerektigin basa aıtty.
Budan soń tárbıelenýshiler kezdesken aımaq basshysy balalardyń túrli suraqtaryna jaýap berip, óziniń oqýshy kezdegi qyzyqtarymen bólisti.
Oblys ákimi tárbılenýshilerdi erkin áńgimege tartyp, olardyń arman-tilekterińe qulaq túrdi. Óz kezeginde oqýshylardyń biri oqý qural-jabdyqtaryn, ónerge qyzyǵatyndary saz aspaptarynyń jetkiliksizdigin, endi biri ınteraktıvti taqtanyń sanyn arttyrý kerektigin aıtyp, ótinish bildirdi.
Asqar Myrzahmetov olardyń ótinishterine beı-jaı qaramaı, qajettilikterin alyp berýge ýáde berdi. Júzdesý estelik sýretke túsýmen aıaqtaldy.
