Asqar Myrzahmetov Qyzylorda oblysyna jumys saparymen bardy
ASTANA. QazAqparat - Búgin Elbasy tapsyrmasyna sáıkes QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov Qyzylorda oblysyna jumys saparymen bardy. Bul týraly AShM baspasóz qyzmeti habarlady.
Jumys sapary Qojakent aýyldyq okrýgindegi 54 JQSh-ny biriktirgen et baǵytyndaǵy aýyl sharýashylyǵy kooperatıvteriniń biri - «Mııaly» otbasylyq mal bordaqylaý alańyn aralaýdan bastaldy. Atalǵan kooperatıv AÓK-ti damytýdyń jańa baǵdarlamasy aıasynda qurylǵan jáne de «Aýyl sharýashylyǵyna qoldaý kórsetý qory» AQ tarapynan qarjylandyrylǵan.
Budan ári vıtse-premer aýyl sharýashylyǵy kooperatsııalaryna arnalǵan óńirlik semınar-jınalysta bolyp, oǵan tóraǵalyq etti. Jıynǵa elimizdiń alty oblysynyń (Qaraǵandy, Batys Qazaqstan, Aqtóbe, Ońtústik Qazaqstan, Qyzylorda jáne Jambyl oblystary) ókilderi qatysty. Otyrys barysynda A. Myrzahmetov AÓK-ti damytýdyń jańa baǵdarlamasynyń basty basymdyǵy - aýyl sharýashylyǵy kooperatsııalaryn damytý ekendigin atap ótti.
Memleket tarapynan aýyl sharýashylyǵy kooperatıvterine barlyq qoldaý sharalary jasalýda. Aıtalyq, bıyldan bastap Jańa baǵdarlama aıasynda aýyl sharýashylyǵy óndirýshilerine kooperatsııalarǵa birikken jaǵdaıda kepilsiz nesıeler berilýde. Buǵan deıin ekinshi deńgeıli bankter aýyl turǵyndarynyń jyljymaıtyn múlkin kepilge qabyldamasa, endigide bul másele óz sheshimin tapty. ıAǵnı, jańa baǵdarlama aıasynda ońynan sheshildi.
Ekinshi asa mańyzdy faktor - bul qural-jabdyqtar qunynyń 50%-ǵa arzandaýy. Mysaly, kooperatıv 5 mln teńge turatyn qural alsa, onda memleket shuǵyl túrde onyń 2,5 mln teńgesin qaıtaryp beredi. Al qalǵan 50%-dy sýbsıdııa arqyly qaıtarýdyń tıimdi tetigi qarastyrylǵan. Bylaısha aıtqanda, qaıta óńdeýge tapsyrylǵan 1 lıtr sút úshin kooperatıv 10 teńgeden alady, al iri qara maldyń ár basy úshin 20 myń teńge, usaq mal úshin 1500 teńge, jem-shóptiń tonnasyna 20 myń teńge beriledi.
Taǵy bir jaǵymdy jańalyq, turǵyndardy jumyspen qamtý baǵdarlamasy aıasynda isin jańadan bastap jatqan kásipkerler «KazAgroKepil» AQ kemildemesimen shaǵyn nesıeniń 85%-yna deıin ala alady. Aıta keterlik jaıt, bul mekemeniń kepildemesi shaǵyn qarjylyq uıymdar men nesıe birlestikteri arqyly qaryzǵa beriledi.
Elbasy tapsyrmasyna sáıkes aýyldyń ál-aýqatyn arttyratyn baǵdarlamaǵa qozǵaý salyndy jáne de ol aýyl sharýashylyǵy keshenin el ekonomıkasynyń draıverine aınaldyrady.
«Aýyl turǵyndary birigýge ázir. Bul úshin barlyq jaǵdaı jasaldy jáne de 50 mlrd teńge kóleminde sýbsıdııalaý, qarajat bólý mehanızmderi ázirlendi. Tipten, naqty ındıkatorlar da bekitildi. Jergilikti atqarý organdaryna úılestirý jumystarymen aınalysyp, alǵa qoıylǵan mindetterdi júzege asyrý ǵana qaldy», - dep atap ótti vıtse-premer.
Atap ótilgen sharalar 500 myńnan asa JQSh men shaǵyn sharýashylyqtardy aýyl sharýashylyǵy kooperatıvterine biriktirýge múmkindik beredi. Qazirgi tańǵa deıin 223 kooperatıv qurylyp úlgerdi. Jyl sońyna deıin 467 kooperatıv qurylady dep kútilýde.
Óz kezeginde, bul úderister kásiporyndardyń júktelimin 30%-ǵa arttyryp, óndirýshi men tutynýshy arasyndaǵy saýda qunyn tómendetýge jol ashady. Sondaı-aq, jumyspen qamtý, kóshi-qon jáne t.b. ózekti máselelerdi sheshedi.
Sonymen qatar, vedomstvo basshysy fermerlermen birge óńirdiń sýmen qamtylýy máselesin talqylap, tarazylady jáne ótken jyldyń kúzinde Shıeli aýdanynda qoldanysqa berilgen toǵandy qarap shyqty. Bul oraıda, Baǵdarlama aıasynda turaqty sýǵarylatyn 610 myń ga aýmaqty alyp jatqan jerdiń ırrıgatsııalyq júıelerin qalpyna keltirý jumystarynyń josparlanyp jatqanyn atap ótken jón. Osy qatarda 368 tys. ga aýmaqtyq kóldetip sýǵarylatyn jer de bar.
Budan bólek, A. Myrzahmetov «Úsen baýy» atty ІІІ oblystyq malshylar sletine qatysty.
