Asqar Myrzahmetov aqmolalyq aýyl sharýashylyǵy taýarlaryn óndirýshilermen kezdesýde
KÓKShETAÝ. QazAqparat - QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov jumys saparymen Aqmola oblysyna keldi, dep habarlaıdy «QazAqparat» HAA tilshisi.
Sapar barysynda vıtse-premer Aqmola oblysynyń ákimi Málik Myrzalın, aýdan jáne qala ákimderi, memlekettik ujymdardyń, aımaqtyq aýyl sharýashylyǵy kásiporyndarynyń basshylary, ǵylymı-zertteý mekemeleriniń ókilderiniń qatysýymen ótip jatqan «2017 jyldyń kóktemgi - egis jumystaryn uıymshyldyqpen júrgizý boıynsha daıyndyq jumystary men qoıylǵan mindetter týraly» oblystyq agrokeńeske qatysýda.
Keńeste kóktemgi egistik naýqanyn júrgizýdiń birinshi kezektegi máseleleri men aýyl sharýashylyǵy óndirisinde ǵalymdar men tájirıbeli mamandardyń usynystaryn talqylandy.
Jalpy, aǵymdaǵy jyly oblys boıynsha jazdyq egisti 4,7 mıllıon aýmaqqa, onyń ishinde astyq daqyldaryn 4,3 mıllıon gektar aýmaqqa egý josparlanǵan. Maıly daqyldardy egý aýmaǵy 241,5 myń gektardy qurasa, kartop pen kókónis - sáıkesinshe 18,4 myń gektar jáne 4,3 myń gektar aýmaqty alatyn bolady.
Bıylǵy egis naýqanyna shamamen 16 myń traktor, 16,8 myń birlik tuqym sepkish jáne 1145 birlik ónimdiligi joǵary egin egý keshenderi jumyldyrylatyn bolady.
Keńeste Aqmola oblysy ákiminiń orynbasary Egor Kappeldiń «2017 jyldyń kóktemgi - egis jumystaryn uıymshyldyqpen júrgizý boıynsha daıyndyq jumystary men qoıylǵan mindetter týraly», A.I.Baraev atyndaǵy astyq sharýashylyǵynyń ǵylymı-óndiristik ortalyǵynyń bas dırektory Jeksenbaı Qasqyrbaevtyń «2017 jylǵy kóktemgi egis naýqanyn ótkizýdiń erekshelikteri týraly» týraly baıandamalary tyńdaldy.
Eske sala keteıik, Aqmola oblysy respýblıkadaǵy eń astyqty óńir (4,3 mıllıon gektardan asa), jyl saıyn elimizdegi óndiriletin astyqtyń shamamen 25 paıyzyn beredi.
Jyl saıyn shamamen 1,8 mıllıon tonna astyqty alys jáne jaqyn shet elderge eksporttasa, 800 myń tonnadan astamyn respýblıkamyzdyń 7 oblysyna taratady.
