Asqar Mamınniń jańa qyzmetke usynylǵany ras pa
ASTANA. KAZINFORM – Keıbir BAQ qańtar oqıǵasyna deıin Premer-mınıstr bolǵan Asqar Mamınniń Ulttyq Olımpıada komıteti prezıdentiniń qysqy sport túrleri jónindegi orynbasary bolatynyn jazyp jatyr. UOK Sport departamentiniń dırektory Elsııar Qanaǵatov osy aqparat týraly pikir bildirdi.
«Asqar Mamınniń kandıdatýrasyn UOK vıtse-prezıdentigine kim usynyp júr? Álde, óz-ózin usyndy ma?» - dep surady jýrnalıst Týrızm jáne sport mınıstrliginiń alqa májilisinen keıin.
UOK ókili qazir Parıj Olımpıadasyna daıyndyq jumystaryna jaýapty bolǵandyqtan, bul máseleden habary joq ekenin aıtty.
«Men de bilmeımin. Ol aqparatty, aıtyp otyrmyn ǵoı, assambleıa ótkizý boıynsha uıymdastyrý máselelerimen aınalysyp jatqan azamattar bar. Men qazir shtabta (Olımpııalyq oıyndarǵa daıyndyq jónindegi shtab – red.) jumys istep jatyrmyn», - dedi Elsııar Qanaǵatov.
