Asqar Mamınniń qatysýymen Túrkistandy damytý boıynsha jıyn ótti
TÚRKІSTAN. QazAqparat - QR Premer-Mınıstriniń birinshi orynbasary Asqar Mamın bastaǵan jumys toby oblys ortalyǵynda atqarylyp jatqan qurylys jumystarymen tanysqan soń Túrkistan qalasyn damytýǵa arnalǵan jıynǵa qatysty, dep habarlaıdy óńir basshysynyń baspasóz qyzmeti.
Keleli jıynǵa QR Mádenıet jáne sport mınıstri A.Muhamedıuly, QR Qoǵamdyq damý mınıstri D.Qaletaev, QR Enegetıka mınıstriniń orynbasary M.Myrzaǵalıev ózge de mınıstrlik ókilderi men ulttyq kompanııa basshylary, Túrkistan oblysynyń ákimi J.Túımebaev jáne ózge de oblys basshylyqtary qatysty.
Jıynda alǵashqy bolyp oblys ákimi Janseıit Túımebaev aldaǵy ýaqytta júzege asyrylatyn jobalar jóninde tanystyrdy.
«Elbasynyń tapsyrmasyna sáıkes, Túrkistan qalasyn damytý jónindegi josparyn iske asyrýǵa ózge oblystardan bólek Ulttyq kompanııalar men bıznes ókilderi atsalysatyn bolady. Búginde qurylys jumystarymen aınalysatyn merdigerlerge qatysty qujattar ázirlenip, tıisti sharalar atqarylýda. ıAǵnı, jańadan salynatyn nysandarǵa arnalǵan jer telimderi zerttelip, daıyndalýda. Sondaı-aq, ınjenerlik kommýnıkatsııalar úshin tehnıkalyq sıpattamalar jasalyp, sáýlettik josparlaý jumystary júrgizildi», - dedi Janseıit Qanseıituly. 
Sondaı-aq, basqosýda Túrkistan qalasynyń ózge de salalaryn damytý boıynsha birqatar mınıstrler men mınıstrlik ókilderi aldaǵy jumys josparlary jóninde baıandama jasady. Atap aıtqanda, QR Mádenıet jáne sport mınıstri A.Muhamedıuly Áziret Sultan kesenesiniń aınalasyn jańǵyrtýǵa baǵyttalǵan jobalarmen tanystyrdy. «Astanagenplan» JShS dırektory S.Júnisov Túrkistan qalasyndaǵy jańa ákimshilik-iskerlik ortalyqtyń nobaıyn kórsetti. Al «BI Group» JShS ókili A.Zıkırın ákimshilik-iskerlik ortalyqta boı kóteretin turǵyn úı kesheni men Uly dala mýzeıi, Týrıstik ortalyq, Shyǵys monshasy, Amfıteatr, Qoja Ahmet ıAsaýı mýzeıi, Oqýshylar saraıy, Oblystyq ǵylymı-ámbebap kitaphanasy, Medıa ortalyq, «Astana» alańy, Ortalyq stadıon syndy ǵımarattardyń jobasymen tanystyrdy.
Jıyndy qorytyndylaǵan QR Premer-Mınıstriniń birinshi orynbasary Asqar Mamın isti jospardan keshiktirmeı der kezinde oryndaýdy tapsyrdy.
