Asqar Mamınniń BAÁ sapary: 2,2 mlrd dollarǵa ınvestıtsııalyq kelisim jasaldy

NUR-SULTAN. QazAqparat - QR Premer-Mınıstri Asqar Mamın Abý-Dabı qalasyna jumys sapary aıasynda Birikken Arab Ámirlikteriniń vıtse-prezıdenti jáne Premer-Mınıstri, Dýbaı ámiri Muhammed ıbn Rashıd ál Maktýmmen jáne BAÁ Premer-Mınıstriniń orynbasary, Prezıdent isteri jónindegi mınıstri sheıh Mansur ben Zaıd ál Nahaıanmen kelissóz júrgizdi. Bul týraly QazAqparat Úkimettiń baspasóz qyzmetine silteme jasap habarlaıdy.

Taraptar osyǵan deıin qol jetkizilgen ýaǵdalastyqtardy iske asyrý barysyn jáne saýda-ekonomıkalyq, qarjy-ınvestıtsııalyq, kólik-logıstıka, agroónerkásip, týrızm, ǵarysh, taý-ken metallýrgııasy, energetıka jáne basqa da salalardaǵy ekijaqty yntymaqtastyq perspektıvalaryn talqylady.

Sondaı-aq Úkimet basshysy BAÁ bıznes kapıtandarymen — «Mubadala» memlekettik holdınginiń, «Aldar Properties», «ADQ», «Al Dahra Holding», «International Holdings Company» («Royal Group») kompanııalarynyń basshylyǵymen kezdesti. Kelissózder qorytyndysy boıynsha QR men BAÁ arasynda qus fabrıkalary men sút-taýar fermalaryn salý, jemister men sańyraýqulaqtardy óndirý jáne óńdeý, TMK jáne geologııalyq barlaý salalaryndaǵy yntymaqtastyq, Ekibastuz qalasynyń ónerkásiptik aımaǵynda Indýstrııalyq park qurý, Shyǵys Qazaqstan oblysynda «Qatonqaraǵaı» týrıstik keshenin qurý, sondaı-aq Qazaqstanda elektromobılder komponentteri óndirisin ashý boıynsha birlesken jobalardy iske asyrý jóninde 17 úkimetaralyq jáne kommertsııalyq kelisimge qol qoıyldy. BAÁ Qaraǵandy oblysynda sýmen jabdyqtaý jáne sý burý boıynsha jobalardy iske asyrýǵa qatysady, bul jobalar ozyq tehnologııalardy berýdi jáne keıinnen Qazaqstanda óndiristi jergiliktendirýdi kózdeıdi. AÓK jobalaryn qarjylandyrý úshin Qazaqstan men BAÁ jalpy kapıtaly $100 mln bolatyn birlesken qor qurýǵa nıetti. AHQO alańynda «E-Banking» salasyndaǵy yntymaqtastyq damıtyn bolady. Kórsetilgen jobalar boıynsha QR ekonomıkasyna ınvestıtsııalardyń jalpy somasy shamamen $2,2 mlrd quraıdy. Investıtsııalyq jobalar qosylǵan quny men rentabeldiligi joǵary, sondaı-aq ishki jáne perspektıvaly syrtqy naryqtarda suranystyń úlken áleýeti bar jańa óndiristerdi qurýdy kózdeıdi. Olardy iske asyrý Qazaqstanda jańa sapaly jumys oryndaryn qurýǵa, ozyq tehnologııalar men is-tájirıbeni engizýge múmkindik beredi. Eki el arasyndaǵy áýe qatynasyn keńeıtý aıasynda ámirliktiń «Wizz Air Abu Dhabi» loýkosteri bıylǵy mamyr aıynda «Abý-Dabı – Almaty» jáne «Abý-Dabı – Nur-Sultan» baǵyttary boıynsha turaqty jolaýshylar áýe tasymalyn bastaıdy. A. Mamın BAÁ batyrlarynyń «Ýahat ál-Karama» memorıalyna gúl shoqtaryn qoıyp, «Masdar City» eko-qalasynyń aýmaǵynda júzege asyrylyp jatqan jobalarmen tanysty jáne Muhammed ben Zaıd atyndaǵy jasandy zerde ýnıversıtetine bardy. Dýbaı qalasynda Úkimet basshysy Dýbaı halyqaralyq qarjy ortalyǵynyń (DIFC) jáne «Dýbaı ınvestıtsııalyq korporatsııasynyń» basshylyǵymen kelissóz júrgizdi, onyń barysynda QR men BAÁ qarjy-ınvestıtsııalyq yntymaqtastyǵyn, onyń ishinde AHQO alańynda odan ári damytý perspektıvalary talqylandy. Jumys saparyna Strategııalyq josparlaý jáne reformalar agenttiginiń tóraǵasy – AHQO basqarýshysy Qaırat Kelimbetov, ındýstrııa jáne ınfraqurylymdyq damý mınıstri Beıbit Atamqulov, aýyl sharýashylyǵy mınıstri Saparhan Omarov, ekologııa, geologııa jáne tabıǵı resýrstar mınıstri Maǵzum Myrzaǵalıev, ádilet mınıstri Marat Beketaev, Shyǵys Qazaqstan oblysynyń ákimi Danıal Ahmetov, Qaraǵandy oblysynyń ákimi Jeńis Qasymbek, «Báıterek» UBH» AQ basqarma tóraǵasy Aıdar Áriphanov, QR isker toptarynyń ókilderi jáne t. b. qatysty.