Asqar Mamınge densaýlyq saqtaý ınfraqurylymyn damytýdyń jańa standarttaryn engizý týraly baıandaldy

NUR-SULTAN. QazAqparat - QR Premer-Mınıstri Asqar Mamın «Astana medıtsına ýnıversıteti» KEAQ janyndaǵy Birikken ýnıversıtet aýrýhanasynyń qurylys alańyna bardy, dep habarlaıdy QazAqparat Úkimettiń baspasóz qyzmetine silteme jasap.

Densaýlyq saqtaý ınfraqurylymyn damytýdyń jańa standarttaryn engizý máseleleri qaraldy, olardy memlekettik-jekeshelik áriptestik aıasynda elimizde 20 iri kópbeıindi aýrýhana salý arqyly iske asyrý josparlanyp otyr. Olardyń ishinde 4 klınıka elimizdiń jetekshi medıtsınalyq ýnıversıtetteriniń janynan salynatyn bolady, bul ǵylymdy, bilim berýdi jáne emdeý protsesin keshendi túrde damytýǵa, klınıkalyq zertteýlerdiń tıimdiligin arttyrýǵa múmkindik beredi.

Osyndaı zamanaýı mekemelerdiń biri «Astana medıtsına ýnıversıteti» KEAQ janyndaǵy Birikken ýnıversıtet aýrýhanasy bolady. Medıtsınalyq ortalyq JCI halyqaralyq standarttaryna saı, 800 tósektik táýliktik statsıonardy, kúndizgi statsıonardy, konsýltatsııalyq-dıagnostıkalyq keshendi, ǵylymı-zertteý jáne klınıkalyq zerthanalardy, aýdıtorııalar men oqý synyptaryn qamtıtyn bolady. Jobany 2023 jyldyń І toqsanynda iske asyrý kózdelgen.

«Halyqaralyq standarttarǵa saı keletin zamanaýı medıtsınalyq ınfraqurylymnyń bolýy elimizdiń búkil densaýlyq saqtaý júıesin odan ári damytý úshin túbegeıli mánge ıe. Aldymyzda densaýlyq saqtaý ınfraqurylymyn jáne medıtsına qyzmetkerleriniń biliktiligin jańǵyrtý boıynsha aýqymdy mindetter tur, bul halyqqa medıtsınalyq qyzmetterdi sapaly jańa deńgeıde kórsetýge jol ashady», — dedi A. Mamın bolashaq medıtsına ortalyqtarynyń shoý-rýmyn tekserý kezinde.

Inspektsııalyq saparǵa Premer-Mınıstrdiń orynbasarlary Roman Sklıar men Eraly Toǵjanov, Nur-Sultan qalasynyń ákimi Altaı Kólginov, densaýlyq saqtaý mınıstri Alekseı Tsoı, ındýstrııa jáne ınfraqurylymdyq damý mınıstri Beıbit Atamqulov qatysty.