Asqar Mamın jumys saparymen Shymkent pen Túrkistan qalalarynda boldy

NUR-SULTAN. QazAqparat – QR Premer-Mınıstri Asqar Mamın Tuńǵysh Prezıdent – Elbasy Nursultan Nazarbaevtyń jáne Memleket basshysy Qasym-Jomart Toqaevtyń Shymkent qalasyn jáne Túrkistan qalasyn damytý jónindegi tapsyrmalaryn oryndaý boıynsha óńirge jumys saparymen bardy, dep habarlaıdy primeminister.

Shymkent qalasynda A. Mamın «Badam» (195-oram) turǵyn úı alabynyń ınjenerlik ınfraqurylym jaǵdaıymen tanysty, onyń elektrmen jabdyqtaý problemasymen mektep muǵalimi Gúlnaz Ábdirova «Nur Otan» partııasyna júgingen bolatyn. Bıyl 27 qyrkúıekte «Nur Otan» partııasynyń qoǵamdyq qabyldaýynda azamattardy jeke qabyldaý barysynda Úkimet basshysy G. Ábdirovaǵa 195-oram úılerin elektrmen jabdyqtaý jumystaryn osy jyldyń jeltoqsan aıynda aıaqtaý qarastyrylǵanyn aıtty, sý qubyry jáne gaz jelilerin salý jobasy boıynsha jobalyq-smetalyq qujattama ázirlenip jatyr.

Premer-Mınıstr arheologııalyq qazba jumystary kezinde tabylǵan «Shymkent qalashyǵyn» restavratsııalaý jáne mýzeılendirý jónindegi «Tsıtadel» jobasynyń alańyna bardy. Jobanyń tarıhı qundylyǵy bar jáne ol 2020 jyly «Shymkent – TMD-nyń mádenı elordasy» jylyn atap ótý aıasynda tartymdy týrıstik nysan bolýǵa arnalǵan.

Úkimet basshysy Qazaqstan naryǵymen qatar, Ózbekstan, Qyrǵyzstan jáne Tájikstan naryqtaryna ónimderin jetkizetin «Zerde-Keramıka» keramogranıt óndirý zaýytyna bardy.

Sonymen qatar, A. Mamın óńirdiń toqyma salasyn jandandyrý josparlarymen tanysty.

2019 jyldyń 8 aıynda Shymkent qalasynda ónerkásiptik ónim óndirisiniń kólemi 359,6 mlrd teńgeni qurady. Óńdeý ónerkásibi óndirisi 17,8%-ǵa, onyń ishinde hımııa ónimderi óndirisi 21%-ǵa, metallýrgııa – 25,9%-ǵa, munaı ónimderi óndirisi 31,5%-ǵa ósti. Shymkent qalasynda jumys istep turǵan shaǵyn jáne orta kásipkerlik sýbektileriniń sany 67,2 myń birlikke jetti nemese 2018 jyldyń sáıkes kezeńimen salystyrǵanda 114,5% quraıdy.

Úkimet basshysyna ótkizý qabileti saǵatyna 400 jolaýshyny quraıtyn Shymkent qalasy áýejaıynyń jańa termınalynyń jobasy tanystyryldy, ony 2020 jylǵy qazanǵa qaraı aıaqtaý kózdelgen.

Premer-Mınıstr Túrkistan qalasyn jańǵyrtýdyń 1-kezeńi aıasyndaǵy jumystar barysyn tekserdi, onyń ishinde ákimshilik, áleýmettik jáne tarıhı-mádenı mańyzy bar nysandar: ákimdik, basqarmalar jáne departamentter ǵımarattarynyń, medıa ortalyqtyń, «Nur-Sultan» alańynyń, Olımpıadalyq rezervtegi sport mektebiniń, Halyqqa qyzmet kórsetý ortalyǵynyń, mýzyka mektebiniń, attraktsıondary bar qala saıabaǵynyń, neke qııý saraıynyń, vızıt-ortalyqtyń, Shyǵys monshasynyń, amfıteatr men qalalyq Arbattyń qurylysyn tekserdi.