Asqar Mamın jóndeýden ótken Petropavl áýejaıynda boldy
PETROPAVL. QazAqparat - QR Premer-Mınıstriniń birinshi orynbasary Asqar Mamın jumys saparymen Soltústik Qazaqstan oblysyna keldi, dep habarlaıdy «QazAqparat» HAA tilshisi.
Ol áýejaıda termınal jumystarymen tanysty. Bul jerdegi jóndeý jumystary 2016 jyly aıaqtalǵan. QR Úkimetiniń rezervinen bólingen 7 mlrd teńgege ushyp-qoný jolaǵynyń tósemi jaqsartyldy, sondaı-aq keńeıtilip, uzartyldy. Jermen júrý joldary men perron qaıta jóndelip, jaryqpen sıgnal beretin qurylǵy ornatyldy, buǵan qosa barlyq ınjenerlik kommýnıkatsııalar almastyryldy, aerovokzal úshin rentgen-televızııalyq tekserý qurylǵysy satyp alynyp, vıdeokameralar ornatyldy.
Qaıta jańǵyrtý jumystarynan keıin Petropavldyń halyqaralyq áýejaıy kez kelgen sanattaǵy áýe kemelerin qabyldaı alady.
Oblys ákimi Qumar Aqsaqalovtyń aıtýynsha, Aımaqaralyq yntymaqtastyq forýmynyń ótýine baılanysty áýe kemeleriniń turaǵyn 2-den 6 orynǵa keńeıtý qajettiligi bar.
«Áýejaıdyń balansynda turǵan arnaıy tehnıka eskirgen. Biz áýejaıdyń júktemesi boıynsha kompanııalarmen kelisip jatyrmyz. Jańa 7 tehnıka qajet», - dep atap ótti óńir basshysy.
Asqar Mamın turaqty keńeıtý jáne arnaıy tehnıka satyp alý múmkindikterin qarastyrýǵa ýáde berdi.
Bıyl óńirdegi áýejaıǵa alyp baratyn tasjolǵa kúrdeli jóndeý júrgiziledi. Oǵan 985 mln teńge jumsalmaq.
Petropavldaǵy áýejaı 1974 jyldan bastap jumys istep keledi.
