Asqar Mamın: Jasandy ıntellekt tehnologııalaryn damytý úshin EAEO aıasynda qolaıly jaǵdaı jasaý kerek

ALMATY. QazAqparat - Jasandy ıntellektti paıdalaný EAEO ekonomıkasynyń kóptegen baǵyttaryn ońtaılandyrýǵa kómektesedi.

Bul týraly QR Premer-Mınıstri Asqar Mamın «Jahandyq ekonomıkanyń tsıfrlyq bolashaǵy» forýmynda aıtty, dep habarlaıdy QazAqparat tilshisi.

Premer-Mınıstrdiń pikirinshe, jasandy ıntellekt áleýetin barynsha damytý EAEO elderiniń jahandyq básekelestigin arttyrýdyń sheshýshi faktory bolmaq.

«Osyǵan baılanysty jasandy ıntellekt tehnologııasyn serpindi damytý úshin EAEO aıasynda qolaıly jaǵdaı jasap, kelisilgen sharalar qabyldaý qajet. Jalpy zertteý qyzmetin damytýda, standarttar men erejelerdi ázirleýde belsendi yntymaqtastyq ornatý mańyzdy», - dedi Asqar Mamın.

Sonymen qatar, Úkimet basshysy jasandy ıntellektti paıdalaný bizdiń ekonomıkamyzdyń kóptegen qyzmet salalaryn ońtaılandyrýǵa yqpal etetindigin atap ótti.

«Búgingi tańda jahandyq básekege adamı kapıtaldyń deńgeıi, eldegi tehnologııalyq daıyndyq pen tsıfrlandyrý faktorlary shyqty. Qazirgi tańda álemdik ekonomıkany damytý úshin zamanaýı tehnologııalardy jedel qamtamasyz etý qolǵa alyndy. Bolashaqta jańa tehnologııalyq óndirister qurý qajettiligi kúsheıetinin atap ótkim keledi «, - dedi Premer-Mınıstr.

Buǵan deıin, Asqar Mamın Qazaqstanda jasandy ıntellekt tehnologııasyn engizý boıynsha alǵashqy qadamdar jasalynǵanyn aıtqan bolatyn.

Eske salaıyq, Almatyda «Jahandyq ekonomıkanyń tsıfrlyq bolashaǵy» forýmy ótip jatyr. Bul sharaǵa Armenııa, Belarýs, Qazaqstan, Qyrǵyz Respýblıkasy, Reseı Federatsııasynyń, Moldova úkimetiniń basshylary men premer-mınıstrleri qatysyp jatyr.