Asqar Mamın Jańǵyrtý jónindegi ulttyq komıssııa otyrysyn ótkizdi
«QR Tuńǵysh Prezıdenti – Elbasy N. Nazarbaevtyń Bes ınstıtýtsıonaldyq reformasyn iske asyrý jónindegi 100 naqty qadam» Ult josparyn oryndaý boıynsha 2021 jylǵy jumys qorytyndylary shyǵaryldy. Atqarylyp jatqan jumystar týraly ulttyq ekonomıka mınıstri Áset Erǵalıev, aýyl sharýashylyǵy mınıstri Erbol Qarashókeev, ındýstrııa jáne ınfraqurylymdyq damý mınıstri Beıbit Atamqulov, ekologııa, geologııa jáne tabıǵı resýrstar mınıstri Serikqalı Brekeshev, densaýlyq saqtaý mınıstriniń mindetin atqarýshy Jandos Búrkitbaev, Nur-Sultan qalasynyń ákimi Altaı Kólginov jáne t. b. baıandady.
Qazirgi ýaqytta Ult josparynyń 100 qadamynyń 76 qadamy iske asyryldy: «Kásibı memlekettik apparatty qalyptastyrý» baǵyty boıynsha 15 qadamnyń 13-i, «Zań ústemdigin qamtamasyz etý» baǵyty boıynsha 19 qadamnyń barlyǵy, «Indýstrııalandyrý jáne ekonomıkalyq ósý» baǵyty boıynsha 50 qadamnyń 31-i, «Biregeılik jáne birlik» baǵyty boıynsha 6 qadamnyń 3-i, «Esep beretin memleketti qalyptastyrý» baǵyty boıynsha barlyǵy 10 qadam oryndaldy.
«Memleket basshysy Qasym-Jomart Kemeluly Toqaev Ult jospary men Bes ınstıtýtsıonaldyq reforma aıasynda QR Tuńǵysh Prezıdenti – Elbasy Nursultan Ábishuly Nazarbaevtyń reformalaryn tolyqqandy ári sapaly júzege asyrýǵa erekshe kóńil bóledi. Bıyl edáýir jumys júrgizilip, jaqsy nátıjelerge qol jetkizildi», — dedi A. Mamın.
Premer-Mınıstr Ult josparyn júzege asyrý boıynsha odan ári belsendi jumys júrgizýdi tapsyrdy. Densaýlyq saqtaý jáne bilim berý júıelerin jetildirý, sondaı-aq, birinshi kezekte, ekonomıkanyń basym sektorlaryndaǵy jańa iri jobalarǵa ınvestıtsııa tartý kólemin arttyrý jónindegi tarmaqtarǵa erekshe nazar aýdaryldy.
Otyrysta geologııa jáne jer qoınaýyn paıdalaný, medıtsına jáne farmatsevtıka, energetıka, tsıfrlandyrý jáne t. b. salalardaǵy Ult josparynyń qadamdaryn kelesi jyly iske asyrýdy kózdeıtin Ulttyq komıssııanyń 2022 jylǵa arnalǵan jumys jospary bekitildi.
