Asqar Mamın: Zań jobalaryn engizý merzimderi buzylsa birinshi basshylardyń jaýapkershiligi qaralady
NUR-SULTAN. QazAqparat - 2020 jyly zań jobalaryn engizý merzimderi buzylǵan jaǵdaıda tikeleı birinshi basshylardyń jaýapkershiligi qaralady. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Bıylǵy jyldyń josparyna 32 zań jobasy kirdi. Olardyń barlyǵy Parlamentke engizildi. Ázirlengen zań jobalarynyń arasynda mańyzdylary retinde «Pedagog mártebesi týraly», «Halyq densaýlyǵy jáne densaýlyq saqtaý júıesi týraly» kodeksti, Ekologııalyq kodeksti jáne basqalaryn atap ótý kerek. Sonymen qatar, josparǵa ázirleýshi organdardyń bastamasymen bıylǵy jyly birneshe ret ózgerister engizilgenin atap ótkim keledi. Olar zań jobalaryn Úkimet pen Parlamentke engizý merzimderin aýystyrýǵa jáne zań jobalaryn qosýǵa baılanysty boldy. Osy rette zań jobalaryn engizý merzimderin saqtalýyn qamtamasyz etip, zań jobalarynyń sapasyna asa nazar aýdarý qajet.
Premer-Mınıstr memlekettik organdardyń birinshi basshylaryna zań jobalaý jumysyn jeke baqylaýǵa alýdy tapsyrdy.
«Budan bylaı josparly zań jobalaryn engizý merzimderi buzylǵan jaǵdaıda tikeleı birinshi basshylardyń jaýapkershiligi qaralatyn bolady. 2020 jylǵa arnalǵan jospar jobasyna ózekti jáne mańyzdy máselelerdi sheshýge, Elbasy men Prezıdent tapsyrmalaryn oryndaýǵa 17 zań jobasy engizildi. Jańa zań jobalary ázirlenedi. Onyń ishinde«Ardagerler týraly», «Ósimdikter álemi týraly» jáne qoldanystaǵy zańnamaǵa ózgerister engizýdi kózdeıtin taǵy da basqa birqatar zań jobalary bar», - dedi Asqar Mamın.
Aıta keteıik, Úkimet otyrysynda QR Ádilet mınıstri Marat Beketaev zań jobalaý jumystarynyń 2019 jylǵa arnalǵan josparynyń oryndalý barysy jáne 2020 jylǵa arnalǵan jospar jobasy týraly baıandaǵan edi.
