Asqar Mamın «Tyson Foods» basshylyǵymen elimizde et óńdeý jobasyn iske asyrý máselesin talqylady

NUR-SULTAN. QazAqparat - QR Premer-Mınıstri Asqar Mamın «Tyson Foods» halyqaralyq bıznes jónindegi prezıdenti Krıstofer Langholtspen kezdesý ótkizdi. Kezdesýde Qazaqstanda zamanaýı agro-mýltıproteın ındýstrııasyn damytý máseleleri talqylandy, dep habarlaıdy QazAqparat Úkimettiń baspasóz qyzmetine silteme jasap.

QR Premer-Mınıstri A. Mamınniń AQSh-qa sapary barysynda 2019 jylǵy jeltoqsanda qol qoıylǵan kelisimge sáıkes «Tyson Foods» qazaqstandyq «Kusto Group» kompanııasymen birlesip Qazaqstanda sıyr eti óndirisiniń tolyq tsıklin ashýdy josparlap otyr.

Osylaısha, birinshi kezeńde QR-da ónimdiligi táýligine keminde 2 myń basty quraıtyn zamanaýı et óńdeý keshenin salý kózdelgen. Kásiporyn qazaqstandyq naryqtyń qajettilikterin qamtamasyz etip qana qoımaı, sonymen qatar ónimdi shetel naryqtaryna da eksporttaıtyn bolady. Jobany iske asyrý et ındýstrııasyn jáne AÓK-tiń basqa da irgeles salalaryn – veterınarııany, agrarlyq mashına jasaýdy, jemshóp daqyldaryn ósirýdi, bordaqylaý alańdaryn qurýdy jáne t. b. damytýdy yntalandyratyn bolady. Qazaqstannyń aýyl sharýashylyǵynda on myńdaǵan jańa jumys oryndary ashylady. Óndiristik tsıkl amerıkalyq «Ekstenshn» qyzmetiniń modeli boıynsha qazaqstandyq fermerlerge aqparattyq-konsýltatsııalyq qyzmet kórsetýmen súıemeldenetin bolady, bul konsýltatsııa berýdi, jergilikti jerlerde kadrlardyń biliktiligin arttyrýdy jáne kásiptik-tehnıkalyq oqytýdy qamtıdy. «Tyson Foods» kompanııasynyń negizi 1935 jyly qalanǵan, kompanııa aınalymy $43,1 mlrd quraıdy, qyzmetkerler sany – 139 myń adam.
.