Asqar Mamın túrkııalyq bıznesmendermen kezdesti
Eki el arasyndaǵy bıznes qurylymdardyń ózara tıimdi yntymaqtastyǵyn nyǵaıtý jáne Qazaqstanda jańa birlesken ınvestıtsııalyq jobalardy iske asyrý máseleleri talqylandy.
«Túrkııa Qazaqstannyń negizgi saýda seriktesteri sanalatyn 10 top el qataryna kiredi. Bizdiń elderdiń arasyndaǵy taýar aınalymy 2018 jyldyń qorytyndysy boıynsha $1,9 mıllırdtan asty. Bıylǵy 7 aı ishinde ózara saýda kólemi 2018 jyldyń osyndaı kezeńimen salystyrǵanda 73,5% ósti. Biz túrkııalyq kompanııalardyń Qazaqstanda ekonomıkalyq jobalardy iske asyrýǵa qatysýyn joǵary baǵalaımyz. Bizdiń ortaq mindetimiz - ınvestıtsııalyq yntymaqtastyq deńgeıin kóterý», - dedi A. Mamın.
Úkimet basshysy túrkııalyq bıznesti AÓK, jeńil ónerkásip, qurylys materıaldary salalarynda eksportqa baǵdarlanǵan kásiporyndardy qurýǵa shaqyrdy.
Bıyl 11 qarashada Ankarada ótkizý josparlanyp otyrǵan Qazaqstan-Túrkııa úkimetaralyq komıssııa otyrysynyń aıasynda bıznes-forým ótkiziledi.
Qazaqstanda túrli salalarda túrkııalyq kapıtaldyń qatysýymen 2200 kásiporyn jumys isteıdi. Túrkııamen birlesip farmatsevtıkalyq preparattar, elektrondy-optıkalyq prıborlar, alkogolsiz sýsyndar men kondıterlik ónimderdi óndirý salalarynda $1,6 mlrd somasyna 34 iri ınvestıtsııalyq joba júzege asyryldy. Qazir qurylys jáne paıdaly qazbalardy óńdeý tárizdi salalarda 2,2 mlrd somasyna 16 joba iske asyrylyp jatyr.
«Túrkııalyq jáne qazaqstandyq bıznesmender qaýymdastyǵy» 2016 jyly QR Táýelsizdiginiń jáne Qazaqstan men Túrkııa arasyndaǵy dıplomatııalyq qatynastardyń 25 jyldyǵyna oraı qurylǵan. Oǵan«Ahsel Holding», «Alarko», GQ Management «Aykar Group», «Eksen Group», «Eurasian Machinery», «Efes Kazakhstan», «Coca-Cola», «Kassanov Investment Group», «Makyol», «Sembol-Rixos Group», «Wyndham Hotel Group», «A-SYS Engineering», «Ramstore», «Stone Decor» jáne qurylys, qonaq úı, ındýstrııalyq sektorlar, jeńil ónerkásip salalaryndaǵy basqa da kompanııalar kiredi.
