Asqar Mamın Túrkistandaǵy qurylys jumystarynyń barysymen tanysty
TÚRKІSTAN. QazAqparat - Búgin QR Premer-Mınıstriniń birinshi orynbasary Asqar Mamın jumys saparymen Túrkistan oblysyna keldi.
Sapary barysynda aımaq basshysy Janseıit Túımebaev ony Túrkistan qalasynda jańadan boı kóteretin nysandardyń qurylys jumystarymen tanystyrdy, dep habarlaıdy QazAqparat tilshisi.
Astanalyq qonaqtar aldymen qurylysty júrgizetin kompanııalardyń jumysshylarymen kezdesip, olardyń eńbek jaǵdaıymen tanysty. Túrkistan qalasynyń bas jospary boıynsha 7,7 gektar aýmaqqa ákimshilik iskerlik-ortalyq salynatyn bolady. Onda oblys ákimshiligi, basqarmalar men aýmaqtyq departamentterdiń ǵımarattary boı kóteredi. Qurylys jumystary aǵymdaǵy jyldyń qańdar aıynda bastalyp, 2020 jyldyń naýryz aıynda aıaqtalady dep kútilýde. 
Oblys ortalyǵynda sondaı-aq, Astana qalasynyń tapsyrysy boıynsha shahardyń shyraıyn arttyratyn «Astana» alańy boı kóteredi. Onyń qurylys jumystary aǵymdaǵy jyldyń naýryz aıynda bastalyp, 2020 jyldyń jeltoqsan aıynda aıaqtalýy tıis. 4,7 gektar aýmaqqa salynatyn nysannyń qurylys jumystaryna 100 adam jumyldyrylmaq.
Sonymen qatar, «Samuryq-Qazyna» ulttyq ál-aýqat qory» aktsıonerlik qoǵamynyń tapsyrysymen 1000 adamǵa shaqtalǵan Kongress ortalyq salynady. Mádenı oshaqtyń qurylys jumystary kelesi aıda bastalyp, 2020 jyldyń sońynda aıaqtalady. Nysannyń jalpy aýmaǵy 3 gektardy, al ǵımarattyń jer kólemi 14 200 sharshy metrdi quraıdy. 
Odan bólek, «Samuryq-Qazyna» ulttyq ál-aýqat qory» aktsıonerlik qoǵamy Túrkistanda oqýshylar saraıynyń qurylysyn júrgizýge tapsyrys jasaǵan. 1 gektar jerdiń 10 myń sharshy metrine zamanaýı úlgidegi sáýletti ǵımarat turǵyzylady. Qurylys jumystary osy jyldyń aqpan aıynda bastalyp, 2020 jyldyń jeltoqsan aıynda paıdalanýǵa beriledi dep josparlanǵan.
Aıta keterligi, búginde Túrkistan qalasynda salynatyn ǵımarattardyń jer telimderi belgilenip, birqatar jobalar bekitilgen.
