Asqar Mamın Túrkistan qalasyndaǵy qurylys jumystarymen tanysty
TÚRKІSTAN. QazAqparat - Búgin QR Premer-Mınıstriniń birinshi orynbasary Asqar Mamın resmı saparmen Túrkistan oblysyna keldi. Sapar barysynda óńir basshysy Janseıit Túımebaev Túrkistan qalasyndaǵy atqarylyp jatqan qurylys jumystarymen tanystyrdy, dep habarlaıdy QazAqparat tilshisi.
Asqar Mamın bastaǵan jumysshy top aldymen jańadan salynyp jatqan Ákimshilik-iskerlik ortalyqta boldy. Búginde ondaǵy 48,4 gektar aýmaqqa birinshi kezekte salynýy tıis 13 nysandy iske asyrý úshin jer telimderi tolyǵymen bosatylǵan. Qazirgi tańda onda oblystyq ákimdik pen basqarmalardyń jáne departamentterdiń ǵımarattary salynyp jatyr. Budan soń Asqar Mamınge 26 kópqabatty turǵyn úı men 88 kópqabatty turǵyn úıdiń jáne saýda ortalyqtardyń qurylys jumystary tanystyryldy.
Aıta keterligi, 1536 páterden turatyn baspananyń 1200 páteri (20 turǵyn úı) - arendalyq úıler, qalǵan 6 turǵyn úı, ıaǵnı 336 páter - kredıttik baspana. Іrgetasy osy jyldyń qyrkúıek aıynda qalanyp, memlekettik bıýdjet esebinen salynyp jatqan 60 páterli 20 turǵyn úıdiń 11-i (660 páter) osy jyldyń sáýir aıynda tapsyrylady. Qalǵan 6 turǵyn úı (540 páter) qurylysy qarasha aıynda bastalǵan-dy. Tapsyrylý merzimi keler jyldyń qarasha aıyna josparlanǵan. Jańadan boı kóteretin 88 turǵyn úıdiń 44-i 2019 jyly paıdalanýǵa berilse, qalǵan 44 úı 2020 jyly el ıgiligine tapsyrylady dep kútilýde.
Asqar Mamın bastaǵan jumysshy topty oblys ákimi Janseıit Túımebaev nysan basyna ózi alyp baryp, Túrkistanda boı kóteretin Qoja Ahmet ıAsaýı mýzeıiniń qurylysymen tanystyrdy. Túrkistan qalasynyń rýhanı-mádenı aımaǵynda «Samuryq-Qazyna» UÁQ» AQ tapsyrysymen Qoja Ahmet ıAsaýı murajaıynyń nysany boı kóterýde. Aýmaǵy 3200 sharshy metrdi quraıtyn mýzeıdiń qurylys jumystaryn aıaqtaý 2020 jyldyń sońyna qaraı josparlanyp otyr. Birinshi vıtse-premer qurylys jumystarymen tanysyp, jumysty qarqyndatýdy tapsyrdy.
Astanalyq jumysshy top aıaldaǵan kelesi nysan - Áziret Sultan qoryq mýzeıi boldy. Munda da qurylys qarqyn alyp, mádenı-tarıhı Vızıt ortalyǵy turǵyzylmaq.
Sapar sońynda Túrkistan men Qyzylorda oblysynyń óndiris oryndary óndiretin qurylys materıaldary kórmesi ótti. Onda qysh, plıta jabyndy syndy qurylysqa qajetti jabdyqtar qoıyldy.
