Asqar Mamın táýelsizdik jyldaryndaǵy aıshyqty oqıǵalardy atady

NUR-SULTAN. QazAqparat – QR Premer-Mınıstri Asqar Mamın «Nur Otan» partııasy Saıası keńesiniń keńeıtilgen otyrysynda táýelsizdik jyldaryndaǵy aıshyqty oqıǵalarǵa toqtaldy, dep habarlaıdy QazAqparat tilshisi.

«1991 jyly álemdegi eń iri Semeı ıadrolyq synaq polıgonyn jabý týraly uzaq kútken tarıhı sheshim qabyldandy. Qazaqstan álemdik ıadroǵa qarsy qozǵalystyń kóshbasshysyna aınaldy.

1992 jylǵy naýryzda Qazaqstan Birikken Ulttar Uıymynyń tolyqqandy múshesi boldy.

1993 jylǵy qarashada elimizdiń óziniń ulttyq valıýtasy – teńge engizildi. Dál sol jyly «Bolashaq» baǵdarlamasy iske qosyldy, onyń aıasynda shamamen 12 myń jastar sheteldi bilim alyp, elimizdiń ıgiligi úshin eńbek etip jatyr», - dedi Úkimet basshysy.

Onyń paıymynsha, Táýelsizdik jyldary qol jetkizilgen nátıjeler eldiń áleýmettik-ekonomıkalyq damýynyń eleýli kórsetkishterin qamtamasyz etýge múmkindik bergen.

«1995 jyly jańa Konstıtýtsııa qabyldandy. 1997 jyly «Qazaqstan-2030» damý strategııasy qabyldanyp, eldiń uzaq merzimdi perspektıvadaǵy naqty damý baǵdaryn aıqyndady. Elbasynyń elordany kóshirý týraly tarıhı jáne strategııalyq sheshimi búkil eldiń damýyna myqty áser etti.

Taǵy bir mańyzdy qadam 2000 jyly Ulttyq qordyń qurylýy boldy. Bul rezerv jınaqtap, eldiń syrtqy táýekelderge qarsy turýǵa múmkindik berdi.

2005 jyly Memlekettik shekaranyń zań júzinde rásimdeýdiń tolyq aıaqtalýy aıtýly oqıǵa boldy.

2012 jyly «Qazaqstan – 2050» strategııasynyń qabyldanýymen álemniń eń damyǵan 30 eliniń qataryna kirý týraly asqaq maqsat mejelendi», - dedi Premer- Mınıstr.

Sondaı-aq, ol Eýrazııalyq ekonomıkalyq odaq Elbasynyń ıntegratsııalyq protsesterdi damytý týraly bastamasy boıynsha qurylǵanyn eske saldy.

«2015 jyly Bes ınstıtýtsıonaldyq reformany iske asyrý boıynsha «100 naqty qadam» Ult jospary bekitildi. Álemdik ekonomıkaǵa ıntegratsııanyń mańyzdy kezeńi - Qazaqstannyń sol jyly qarashada Dúnıejúzilik saýda uıymyna kirýi boldy», -dep atap ótti Asqar Mamın.