Asqar Mamın Taraz qalasynda kárizdik tazartý ǵımaratyn salý jobasyna qatysty pikir bildirdi
NUR-SULTAN. QazAqparat – Úkimet basshysy Asqar Mamın Taraz qalasynyń kárizdik tazartý júıesin jańǵyrtý máselesine qatysty túsinikteme berdi, dep habarlaıdy QazAqparat tilshisi.
Májilis depýtattary Premer-Mınıstrdiń atyna joldaǵan saýalda «TÚKSh QazOrtalyǵy» AQ jalpy somasy 104,3 mlrd teńge turatyn 11 jobanyń 2 tehnıka-ekonomıkalyq negizdemesin ázirlegenin aıta kelip, tizimdegi 11 qalanyń ishinde 357,7 myń turǵyny bar Taraz qalasynyń kirmeı qalǵanyn másele etip kótergen edi. Asqar Mamın óz jaýabynda Taraz qalasy jobalardyń alǵashqy pýlyna enetinin aıtyp otyr.
«Sý sektoryn reformalaǵannan keıin kommýnaldyq kásiporyndar ornyqty jáne bıýdjettik sýbsıdııalarǵa táýelsiz uıymdar retinde óz áleýetin iske asyra alady. Búgingi tańda jalpy sý arnalaryn basqarýǵa konkýrstyq rásimderdiń qorytyndylary boıynsha anyqtalatyn otandyq, sondaı-aq halyqaralyq kompanııalar qyzyǵýshylyq tanytyp otyr.
Qazirgi ýaqytta jobalar pýlyn qalyptastyrý boıynsha jumys júrgizilýde. Onda Taraz qalasynda KTI jobasyn iske asyrý birinshi kezektegi jobalardyń biri bolady. Bul shamamen 358 myń adamdy aǵyndy sýlardan tazartýmen qamtamasyz etýge múmkindik beredi. KTI jobalaryn iske asyrýdyń josparlanyp otyrǵan modeli Qazaqstan Respýblıkasyn aýmaqtyq damytý jónindegi ulttyq jobada bekitiledi», - dedi Premer-Mınıstr.
Dúnıejúzilik bank Qazaqstanǵa kárizdik tazartý júıesin naryqtyq qarjylandyrýǵa kezeń-kezeńmen kóshýdi usynyp otyr.
