Asqar Mamın Taldyqorǵandaǵy aýrýhananyń jumysymen tanysty
TALDYQORǴAN.QazAqparat - Premer-Mınıstr Asqar Mamın Taldyqorǵandaǵy qalalyq kópsalaly aýrýhananyń jumysymen tanysty. Bul jerde Úkimet basshysyna dárigerler onkoaýrýlardy erte kezeńde anyqtaıtyn jaǵdaıattyq ortalyqtyń jumysy jaıly málimdedi, dep habarlaıdy QazAqparat tilshisi.
Radıologııalyq-aqparattyq keshen onkologııalyq aýrýlardy alǵashqy kezeńinde anyqtaýǵa múmkindik beredi. Sebebi bul jerge zamanaýı kompıýterlik serverlerge jasandy ıntellekt ornatylǵan. Ortalyq Almaty oblysynyń 13 emdeý mekemesiniń 70-ten astam qondyrǵylarymen tikeleı jalǵanǵan. Jasandy ıntellekt ol jerdegi aqparatty jedel saralap, rentgen sýretinen obyrdyń bar-joǵy, kezeńi týraly naqty aqparat beredi. Máselen adamnyń kózi 50 túrli ózgeristi kóre alsa, jasandy ıntellekt 60 myńǵa jýyq ózgeristi ajyra alady. Joba memlekettik-jekeshelik seriktestik negizinde júzege asty. Jańa baǵdarlamany Túrkııa eliniń mamandary qazaqstandyq áriptestermen birlese qurastyrǵan.
«Bul ortalyq 2018 jyldyń jeltoqsan aıynda iske qosyldy. Osy ýaqyt aralyǵynda 36 myńnan astam tekserilip, olardyń 146-y adamy qaterli isikpen aýrýy múmkin degen kúdikke ilindi. Al jalpy bul ortalyqtyń jylyna 1 mln-nan astam adamǵa tekserý júrgizip, onkologııalyq aýrýyn erte anyqtaýǵa múmkindigi bar», - dedi oblystyq densaýlyq saqtaý basqarmasynyń basshysy Baýyrjan Ysqaq.
