Asqar Mamın sý tasqyny qaýpine oraı ákimderge tapsyrma berdi
NUR-SULTAN. QazAqparat – Óńir ákimderi sý qoımalary tolýyna únemi baqylaý jasap otyrýy tıis. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Sý tasqynynyń aldyn alý úshin júıeli sharalar qabyldaý qajet. Osyǵan baılanysty, Ekologııa mınıstrligine óńirlerdiń ákimderimen birlesip, bir aı ishinde gıdrotehnıkalyq qurylystardy jóndeý merzimin anyqtaýdy tapsyramyn. Sondaı-aq sý qoımalaryn toltyrýdyń qaýipsiz kólemin anyqtap, olardyń tolýyna únemi baqylaýdy qamtamasyz etsin»,- dedi Asqar Mamın.
Úkimet basshysy Aqtóbe, Qaraǵandy, Pavlodar jáne Soltústik Qazaqstan oblystarynyń ákimdikterine qaraýsyz jatqan gıdrotehnıkalyq qurylystar boıynsha menshik quqyǵyn berý máselesin zańnamaǵa sáıkes aıaqtaýdy tapsyrdy.
«Indýstrııa mınıstrligi men ákimdikter avtojoldardy sý basýǵa jol bermesin, kópirler men sý ótkizý qurylystaryn ýaqytynda daıyndasyn. Ákimder qar shyǵarý, aryqtardy, sý kárizin tazartý, ýaqytsha úıindiler men bógetter turǵyzý jumystaryn ýaqtyly júrgizýdi qamtamasyz etýi qajet», - dedi Premer-Mınıstr.
