Asqar Mamın ShQO-da koronavırýsty emdeýge arnalǵan ǵylymı jobamen tanysty
ÓSKEMEN. QazAqparat - QR Premer-Mınıstri Asqar Mamın ShQO-da kóktemgi egis jumysynyń barysy men óńirdiń áleýmettik-ekonomıkalyq damýyn tekserdi, dep habarlaıdy primeminister.kz.
QR Premer-Mınıstri Asqar Mamın jumys sapary aıasynda Shyǵys Qazaqstan oblysynyń kóktemgi egis jumystary men energetıka, ónerkásip, turǵyn úı jáne áleýmettik ınfraqurylym salalaryndaǵy iri jobalardy iske asyrý barysyn tekserdi.
Altaı aýdanynda Úkimet basshysy «Nıvy Altaıa» JShS egis alqaptarynyń qurylymymen jáne kóktemgi dala jumystarynyń barysymen, Turǵysyn SES qurylysymen, sondaı-aq Altaı qalasynyń aýdanaralyq aýrýhanasynyń ınsýlttik jáne kardıo ortalyqtarynyń qyzmetimen tanysty.
Óskemen qalasynda Premer-Mınıstr QR-nyń iri mashına jasaý jáne metallýrgııa kásiporyndaryna — Óskemen ónerkásiptik armatýra zaýyty men Óskemen tıtan-magnıı kombınatyna baryp, olardy odan ári damytý josparlarymen tanysty.
Úkimet basshysy Óskemen qalasynyń jańa shaǵyn aýdanyndaǵy «Nurly jer» memlekettik baǵdarlamasy aıasynda salynyp jatqan áleýmettik turǵyn úı qurylysyn tekserdi. Munda jalpy aýdany 400 myń sharshy metrge jýyq 48 úı salý josparlanǵan.
D. Serikbaev atyndaǵy Shyǵys Qazaqstan memlekettik-tehnıkalyq ýnıversıtetine barǵan kezde Úkimet basshysyna ǵylymı-zertteý jáne tájirıbelik-konstrýktorlyq, onyń ishinde ımportty almastyrýǵa baǵyttalǵan ázirlemeler usynyldy.
A. Mamın oblystyq balalar aýrýhanasyna baryp, onda reanımatsııalyq jáne operatsııalyq bloktardyń jumysymen, sonymen qatar COVID-19-dan emdeý úshin ımmýndyq plazma bólý jónindegi ǵylymı jobamen tanysty.
