Asqar Mamın Saýda mınıstrine birqatar tapsyrma berdi

NUR-SULTAN. QazAqparat - Búgin Úkimet otyrysynda QR Premer-Mınıstri Asqar Mamın QR Saýda jáne ıntegratsııa mınıstri Baqyt Sultanovqa elektrondy kommertsııany damytýǵa baǵyttalǵan birqatar tapsyrma berdi, dep habarlaıdy QazAqparat tilshisi.

«Elektrondy kommertsııa ekonomıkanyń eń qarqyndy damyp kele jatqan segmentteriniń biri sanalady. Taýarlar men qyzmetterdi Internet arqyly satyp alatyn adamdar sany jyl saıyn ósip keledi. Ádettegi dúkenderge qaraǵanda bul ońaı ári arzan. Qyzmetter men taýarlarlary Internet arqyly rásimdeý jańa jumys oryndaryn qurady. Bizdiń belsendi onlaın satyp alýshylardyń sany qarqyndy damýda. 2018 jyly 2,3 mln adam bolsa, ótken jyly bul kórsetkish 3,2 mln adam jetti jáne onlaın satyp alýshylardyń sany qarqyndy ósip keledi. Bul álemdik trendke tolyq sáıkes», - dedi Úkimet basshysy.

Osyǵan baılanysty Premer-Mınıstr birqatar máselege toqtalyp, Saýda mınıstrine naqty tapsyrmalar júktedi.

«Birinshi, qazaqstandyqtar taýarlardy sheteldik ınternet dúkenderden belsendi túrde satyp ala bastady. Al otandyq óndirýshiler álemdik onlaın alańdarǵa shyǵa bastady. Osy baǵyttaǵy belsendilikti arttyrý kerek. Saýda mınıstrligine elektrondy alańdar arqyly ónimderimizdi eksportqa shyǵarý sharalaryn ázirleýdi tapsyramyn. Ekinshi, elektrondy saýdany damytý úshin tıisti ınfraqurylym qajet. Respýblıkanyń iri qalalarynyń bárinde kólik-logıstıkalyq ortalyqtardyń áleýetin arttyrý kerek. Saýda mınıstrligi Tsıfrlyq damý mınıstrligimen birge ınfraqurylymdy damytý tetikterin ázirlep, is-sharalardy Elektrondy kommertsııany damytý jónindegi 2025 jylǵa deıingi jol kartasyna qossyn», - dedi Asqar Mamın.

Úshinshiden, Úkimet basshysy elektrondy kommertsııanyń qarqyny damýyna baılanysty jańa mamandyqtar shyǵyp, jumys oryndarynyń sany ósip kele jatqandyǵyna aýdardy.

«Sondyqtan Qazaqstannyń iri qalalarynda E-commerce ortalyqtarynyń bazasynda oqytýdy qolǵa alý kerek. Saýda, Bilim, Tsıfrlyq damý mınıstrlikteri jáne «Qazposhta« AQ suranysqa ıe mamandyqtardy oqytý men qaıta daıyndaý boıynsha jumysty jalǵastyryp, elektrondy saýdany júrgizýge nazar aýdarýy tıis. Jalpy, Saýda mınıstrligine bir apta merzimde elektrondy kommertsııany damytý jóninde jol kartany búgingi aıtylǵan tásilderdi eskere otyryp jańartýdy tapsyramyn», - dedi ol.