Asqar Mamın: Salyq jáne keden salasynda bıznes protsesterdi avtomattandyrý kerek

NUR-SULTAN. QazAqparat - Búgin Úkimet otyrysynda QR Premer-Mınıstri Asqar Mamın salyq jáne keden salalary boıynsha bıznes protsesterdi avtomattandyrýdy jalǵastyrýdy tapsyrdy, dep habarlaıdy QazAqparat tilshisi.

«Jalpy, Qarjy mınıstrligi usynǵan tásilderdi qoldaımyz. Múddeli memlekettik organdar osy baǵytta úılestirilgen jumysty jalǵastyrýy qajet. QR Tuńǵysh Prezıdenti - Elbasy tapsyrmasy boıynsha 1 qańtardan bastap ShOB sýbektilerine salyqtyq raqymshylyq jasalyp, aıyppuldar men ósimpuldar keshirildi. Memlekettiń qoldaýmen boryshty joıý nátıjesinde salyq tóleýshilerdiń bank shottaryndaǵy shekteýler alynyp tastaldy. Múlikterge salynǵan shekteýler alyndy», - dedi Úkimet basshysy.

Asqar Mamın Memleket basshysynyń tapsyrmasy boıynsha 2020 jyldyń 1 qańtarynan bastap, arnaıy salyq rejımderin qoldanatyn mıkrobıznes pen shaǵyn bıznes sýbektileri tabys salyǵyn tóleýden úsh jylǵa bosatylǵanyn aıtty.

«Qoryta kelgende birqatar máselege toqtalǵym keledi. Birinshi - bıýdjetke túsetin túsimder josparynyń oryndalýy jóninde. Memlekettik bıýdjetke túsetin túsimderdiń ósý qarqyny 14 paıyz boldy. Bul ótken kezeńmen salystyrǵanda 911 mlrd teńgege artyq. Nátıje jaman emes. Biraq osy qarqyndy tómendetip almaı jumysty jalǵastyrý qajet. Osy rette Qarjy mınıstrligine pysyqtalǵan jospardy sapaly oryndaý úshin barlyq qajetti sharalardy qabyldaýdy tapsyramyn», - dedi ol.

Úkimet basshysy ekinshiden, qazirgi ýaqytta Qarjy mınıstrligi salyq jáne keden salalarynda bıznes protsesterdi avtomattandyrý boıynsha aýqymdy jumys júrgizip jatqanyn aıtty.

«Sonyń ishinde »Astana-1, «E-tereze», «Vırtýaldyq qoıma» jáne basqalary bar. Bul sharalardy iske asyrý protsesterdi ońtaılandyryp qana qoımaı, salyqtyq operatsııalar men kedendik kooperatsııalardy júrgizýdi jedeldetýge ári olardyń ashyqtyǵyn arttyrýǵa múmkindik beredi. Osy jumysty jalǵastyrý qajet», - dedi Asqar Mamın.