Asqar Mamın RF ónerkásip jáne saýda mınıstrimen kezdesti
NUR-SULTAN. QazAqparat - QR Premer-Mınıstri Asqar Mamın Reseı Federatsııasynyń ónerkásip jáne saýda mınıstri Denıs Mantýrovpen kezdesý ótkizdi. Bul týraly primeminister.kz saıtynda habarlandy.
Kezdesýde kólik qurastyrý, aýylsharýashylyq jáne avıatsııalyq tehnıkalardy jasaý, óńirlik servıstik ortalyqtardy damytý salalarynda birlesken jobalardy, sondaı-aq qorǵanys ónerkásibi kesheni jobalaryn iske asyrý turǵysynan Qazaqstan men Reseı kásiporyndary arasynda ónerkásiptik kooperatsııany damytý keleshegi talqylandy.
Kezdesý barysynda ónerkásip kooperatsııasy salasynda birlesken is-qımyldar baǵdarlamasyn ázirleý jumystary júrgizilip jatqany atap ótildi.
Baǵdarlama birqatar birlesken ınvestıtsııalyq jobalardy iske asyrýdy kózdeıdi, onyń ishinde «Kırovets» markasynyń traktorlaryn jáne onyń quraýysh bólikterin «Peterbýrg traktor zaýyty» AQ-men jáne «Agromashholdıng KZ» AQ-men shyǵarýdy uıymdastyrý, KamAZ markasynyń kólik quraldaryna quraýyshtardy, kerneýi 110 kV deıin bolatyn maıly jáne qurǵaq transformatorlardy shyǵarý, tolyq tsıkldi avtozaýyt salý boıynsha «AVTOVAZ» JAQ-pen yntymaqtastyqta «Azııa Avto Qazaqstan» AQ jobasyn iske asyrýdy qarastyrady.
QR Premer-Mınıstri A. Mamınniń aıtýynsha, «Baǵdarlamany iske asyrý ekijaqty ınvestıtsııalyq yntymaqtastyqty damytýǵa, elder arasyndaǵy saýda-ekonomıkalyq qatynastardy nyǵaıtýǵa eleýli serpin beredi.
