Asqar Mamın resmı saparmen Tájikstan men Qyrǵyzstanǵa barady

NUR-SULTAN. QazAqparat - 2019 jylǵy 11-12 shildede Qazaqstan Respýblıkasynyń Premer-Mınıstri Asqar Mamın resmı saparmen Tájikstan Respýblıkasyna (Dýshanbe q.) jáne Qyrǵyz Respýblıkasyna (Bishkek q.) barady, dep habarlaıdy primeminister.kz.

Dýshanbede Qazaqstan Premer-Mınıstri Asqar Mamınniń jáne Tájikstan Premer-Mınıstri Kohır Rasýlzodanyń basshylyǵymen shaǵyn jáne keńeıtilgen quramdardaǵy úkimettik kelissózder ótedi. Taraptar saýda-ekonomıkalyq jáne tranzıttik-kólik yntymaqtastyǵyn odan ári damytý, ónerkásiptik kooperatsııadaǵy ózara is-qımyl, mádenı-gýmanıtarlyq baılanystardy nyǵaıtý máselelerin talqylaıdy.

Bishkekte Qazaqstan-Qyrǵyz Úkimataralyq keńesiniń VIII otyrysy ótedi. Kún tártibinde saýda, ınvestıtsııalar, ónerkásip, kólik, munaıgaz salasy, qorshaǵan ortany qorǵaý, mádenıet, týrızm, bilim berý, densaýlyq saqtaý, sý-energetıka salasy, kedendik jáne shekaralyq ózara árekettestik salalaryndaǵy aǵymdaǵy jáne perspektıvaly yntymaqtastyqtyń 18 máselesi qaralady.

Resmı saparlar aıasynda birqatar qujattarǵa qol qoıý kózdelgen.