Asqar Mamın: Reformalardyń jańa paketi ekonomıkany qysqa merzimde qalpyna keltirýge jaǵdaı jasaıdy
«Memleketti basqarýdy damytýdyń 2030 jylǵa deıingi tujyrymdamasyn sapaly iske asyrý úshin Ulttyq ekonomıka, Qarjy mınıstrlikteri Strategııalyq josparlaý jáne reformalar agenttigimen birlesip, 15 aqpanǵa deıin naqty is-qımyldar josparyn ázirlesin jáne Premer-Mınıstrdiń Keńsesine engizsin. Sonymen qatar, Ulttyq ekonomıka mınıstrligine Aýmaqtyq damý josparynyń jańartylǵan jobasyn bıylǵy 1 sáýirge deıin ázirleýdi tapsyramyn», - dedi A. Mamın Úkimettiń búgingi otyrysynda.
Premer-Mınıstr Qarjy, Ulttyq ekonomıka mınıstrlikteri men Básekelestikti qorǵaý agenttigine eki aptada Jekeshelendirýdiń keshendi josparyn iske asyrý boıynsha kelisilgen usynystardy engizýdi tapsyrdy.
«Ulttyq ekonomıka mınıstrligi múddeli memlekettik organdarmen jáne «Atameken» ulttyq kásipkerler palatasymen birlesip, ekonomıkanyń sapaly jáne turaqty ósýin qamtamasyz etý jónindegi shuǵyl sharalar paketin pysyqtap, ony 8 aqpanǵa deıin Premer-Mınıstrdiń Keńsesine engizip, Ekonomıkalyq ósýdi qalpyna keltirý jónindegi memlekettik komıssııanyń kelesi otyrysynda qaraýǵa shyǵarsyn. Sonymen qatar, Qaırat Nematuly (Kelimbetov – red.) bıyl ótkiziletin halyq sanaǵyn sapaly júrgizý maqsatynda bir kún merzimde meniń tıisti ókimimniń jobasyn engizýdi tapsyramyn. Reformalardyń jańa paketi – ekonomıkany qysqa merzimdi perspektıvada qalpyna keltirýge jáne elimizdiń ornyqty ári sapaly ekonomıkalyq ósý jolyna shyǵýyna jaǵdaı jasaıdy. Osy baǵytta jumysty jalǵastyramyz», - deıdi A. Mamın.
Buǵan deıin Úkimet basshysy ulttyq basymdyqtar, ulttyq jobalar jáne 2025 jylǵa deıin damý jospary týraly tapsyrmalar bergen edi.
Al 29 qańtarda Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysy ótti.
