Asqar Mamın ózin tájirıbeli menedjer retinde kórsetti - Elbasy
- Premer-Mınıstr Baqytjan Saǵyntaev týraly arnaıy aıtqym keledi. Ol buǵan deıin Pavlodar oblysynyń ákimi, ekonomıka mınıstri, vıtse-premer, birinshi vıtse-premer laýazymdaryn laıyqty atqaryp, ózin jaqsy qyrynan kórsetti. Baqytjan Saǵyntaev - adal ári tájirıbeli azamat. Ol basqa da salalarda qyzmet ete alady. Biraq, jekelegen mınıstrlikterdiń, ásirese áleýmettik saladaǵy vedomstvolardyń, jumysyndaǵy olqylyqtar búkil Úkimettiń otstavkaǵa ketýine ákep soqtyrdy, - dedi Elbasy.
Nursultan Nazarbaev halyqaralyq arenadaǵy turaqsyzdyq pen sanktsııalyq teketirester elimizdiń ál-aýqatyn nyǵaıtý úshin tyń sharalar men sheshimder qabyldaýdy talap etetinin aıtty.
Sonymen qatar, Memleket basshysy júrgizilgen saıası jańǵyrýdyń nátıjelerine toqtalyp, onyń aıasynda bılik tarmaqtary arasynda ókilettikterdiń qaıta bólingenin atap ótti.
- Úkimet ózine qajetti quzyrettiń bárin aldy. Endi, halyq aldyndaǵy mindetterin minsiz atqaryp, óz qyzmeti úshin jaýapty bolýǵa tıis. Mundaı jaýapkershilik áleýmettik jáne ekonomıkalyq baǵdarlamalardyń tıimdiligine tikeleı jaýap beretin túrli deńgeıdegi ákimderge de júkteledi. Olar turǵyndardyń aryz-shaǵymdaryna jedel jaýap berip, eń bastysy, tıisti sharalar qabyldaýy qajet, - dedi Qazaqstan Prezıdenti.
Elbasy Parlamenttiń áleýmettik-ekonomıkalyq saıasatty júzege asyrý isindegi róline toqtaldy.
- Áńgime zań jobalaryn sapaly ázirleý ǵana emes, sondaı-aq mańyzdy memlekettik baǵdarlamalar men jobalardy iske asyrý jóninde bolyp otyr. Bul parlamenttik monıtorıngti turaqty júrgizý, úkimettik emes sektordyń qatysýymen dıalog alańdaryn qurý, halyqqa qabyldanyp jatqan memlekettik, sonyń ishinde zańnamalyq sharalardyń mánin túsindirý máselelerine de qatysty, - dedi Nursultan Nazarbaev.
Memleket basshysy jańa Úkimettiń memlekettik baǵdarlamalardy odan ári júzege asyrýǵa, quqyq qorǵaý jáne sot júıesindegi reformalardy aıaǵyna deıin jetkizýge, turǵyndardyń problemalaryn naqty sheshýge tıis ekenin atap ótti.
Nursultan Nazarbaev Konstıtýtsııanyń 44-babyna sáıkes Qazaqstan Respýblıkasy Premer-Mınıstri laýazymyna taǵaıyndaýǵa kelisim berý úshin Asqar Mamınniń kandıdatýrasyn Parlament Májilisiniń qaraýyna usyndy.
- Ol jumys istegen jyldary ózine senip tapsyrylǵan qyzmetterde naqty nátıjelerge qol jetkizdi. Asqar Uzaqbaıuly ózin tájirıbeli menedjer retinde kórsetti. Jańa Úkimettiń tıimdi jumysyn qamtamasyz etý úshin Asqar Uzaqbaıuly Mamınniń kandıdatýrasyn laıyqty dep sanaımyn, - dedi Memleket basshysy.
Parlament Májilisiniń depýtattary Premer-Mınıstr laýazymyna Asqar Mamınniń kandıdatýrasyn biraýyzdan maquldady.
Plenarlyq otyrys barysynda Nursultan Nazarbaev Asqar Mamındi Qazaqstan Respýblıkasynyń Premer-Mınıstri laýazymyna taǵaıyndaý týraly tıisti jarlyqqa qol qoıdy.
Elbasy áleýmettik saıasatymyzdyń negizgi basymdyqtary jóninde aıtyp, ındýstrııalyq baǵdarlamany oryndaý barysynda otandyq óndiristi damytý qajettigine nazar aýdardy.
