Asqar Mamın Ońtústik Qazaqstan oblysynda memlekettik baǵdarlamanyń júzege asyrylý barysyn tekserdi
ASTANA. QazAqparat - QR Premer-Mınıstriniń birinshi orynbasary Asqar Mamın jumys saparymen Ońtústik Qazaqstan oblysynda bolyp, ónerkásip jáne kólik keshenderi kásiporyndaryn, turǵyn úı qurylys nysandaryn aralady, dep habarlaıdy QR Úkimetiniń baspasóz qyzmeti.
QR Premer-Mınıstriniń birinshi orynbasary halyqaralyq Shymkent áýejaıyn aralap kórdi. Ony jańǵyrtý jóninde keńes ótkizdi. Keńeske Ońtústik Qazaqstan oblysynyń ákimi Janseıit Túımebaev qatysty.
«Shymkent respýblıkanyń mańyzdy ónerkásip, týrıstik jáne mádenı ortalyqtarynyń biri. Sondaı-aq, elimizdegi turǵyndary mıllıonnan asatyn úshinshi qala sanalady», - deı kelip Asqar Mamın Memleket basshysynyń óńirdiń damýyna erekshe kóńil bólip otyrǵandyǵyn atap ótti.
«Óńirlerdi damytýdyń 2020 jyldarǵa deıingi Baǵdarlamasy aıasynda Shymkent iri aglomeratsııalyq ortalyqtardyń biri bolyp sanalady. Osyǵan baılanysty qala men óńirdi qosa alǵanda, kólik ınfraqurylymynyń damýyna qajetti zor áleýettiń bar ekendigi kózge kórinip tur», - dedi A. Mamın.
Shymkent áýejaıy elimizdegi jedel damyp kele jatqan áýejaılardyń biri. Bıylǵy 9 aıda jolaýshylar aınalymy 600 myń adamǵa jetkizilip, ótken jylmen salystyrǵanda 30 paıyzǵa óskendigi baıqaldy.
Keńes sońynda A. Mamın QR IDM-ǵa áýejaı ınfraqurylymyn damytýdyń túpkilikti naqty usynysyn ázirleý máselesin tapsyrdy.
Kóliktik-logıstıkalyq ortalyqty qaraý barysynda A. Mamın qurǵaq, klımattyq qoımada bolyp, júk konteınerleri termınalynyń, «Ońtústik» ındýstrııalyq-logıstıkalyq aımaǵynyń jumystarymen tanysty.
Qazirgi tańda KLO qurylysynyń 80 paıyzy oryndalǵan. Jobany bıylǵy jyl aıaǵynda tapsyrý josparlanyp otyr. Konteınerlik termınal jylyna bir mıllıon tonna júk óńdeýge áleýetti. Termınalda bir mezgilde 1600 TEU taýar saqtaý múmkindigi bar. Táýligine bir myń pallet júkti túsirip, tıeı alady. Jylyna 300 myń tonna júk óńdeıdi.
Budan soń, QR Premer-Mınıstriniń birinshi orynbasary Asqar Mamın «Agro V» kirpish zaýytynda bolyp, ónim shyǵarýdyń tehnologııalyq úderisin kózben kórdi.
QR Premer-Mınıstriniń birinshi orynbasary «Nurly jer» baǵdarlamasy aıasynda salynyp jatqan kópqabatty turǵyn úılerdiń qurylys jumysymen tanysty.
Ońtústik Qazaqstan oblysynda 2016 jyly 529,6 myń sharshy metr turǵyn úı salynǵan. Bıylǵy jyl basynan beri turǵyn úı qurylysyna 41,1 mlrd. teńge ınvestıtsııa quıylǵan. Bıylǵy 9 aıda 461,7 myń sharshy metr turǵyn úı paıdalanýǵa berildi. Bul aldyńǵy jylmen salystyrǵanda 19,8 paıyzǵa joǵary kórsetkish.
QR Premer-Mınıstriniń birinshi orynbasary jumys sapary barysynda «Batys Eýropa-Batys Qytaı» halyqaralyq avtokólik dáliziniń Shymkent-Tashkent telimi qurylysy barysymen tanysty. Jalpy uzyndyǵy 99 shaqyrym bolatyn telim qurylysyn 2017 jyly paıdalanýǵa berý josparlanyp otyr.
«Batys Eýropa-Batys Qytaı» tranzıttik dáliziniń Ońtústik Qazaqstan oblysy aýmaǵyndaǵy salynǵan bóligi 418 shaqyrymdy quraıdy.
