Asqar Mamın «Nur Otan» saılaýaldy baǵdarlamasyn iske asyrýdyń jol kartasyn usyndy

NUR-SULTAN. QazAqparat - QR Premer-Mınıstri Asqar Mamın beınekonferentsııa baılanysy rejıminde QR Parlamenti Májilisiniń tóraǵasy, fraktsııa basshysy Nurlan Nyǵmatýlın ótkizgen «Nur Otan» partııasy fraktsııasynyń otyrysyna qatysty.

Bul týraly QazAqparat QR Úkimetiniń resmı saıtyna silteme jasap habarlaıdy.

«Nur Otan» partııasynyń tóraǵasy, QR Tuńǵysh Prezıdenti – Elbasy Nursultan Nazarbaevtyń tapsyrmasy boıynsha «Ózgerister joly: árkimge laıyqty ómir!» partııanyń saılaýaldy baǵdarlamasyn júzege asyrý jónindegi jol kartasy ázirlendi. Memleket basshysy Qasym-Jomart Toqaev saılaýaldy baǵdarlamanyń ýaqytyly ári tıimdi oryndalýy boıynsha sharalar qabyldaýdy tapsyrdy», — dedi A. Mamın qujatty depýtattarǵa tanystyra otyryp.

Jol kartasy Saılaýaldy baǵdarlamanyń tórt baǵytyn iske asyrý boıynsha 362 is-sharany qamtıdy: «Barshaǵa teń múmkindikter», «Zııatker, salamatty jáne yjdaǵatty ult», «Ekonomıka men óńirlerdiń turaqty damýy», «Halyqqa esep beretin memleket jáne jaýapty azamattar». Turǵyn úı qurylysynyń kólemin, onyń ishinde jeńildikti áleýmettik turǵyn úı kólemin ulǵaıtý, áıelder kásipkerligin, mektepke deıingi jáne orta bilim berýdi damytý arqyly qazaqstandyq otbasylardy qoldaý men nyǵaıtý boıynsha júıeli sharalar iske asyrylatyn bolady.

Úkimet qalalar men aýyldardyń ınfraqurylymyn odan ári damytý jáne jańǵyrtý, respýblıkalyq joldardy rekonstrýktsııalaý jáne jol boıyndaǵy servıspen qamtamasyz etý jóninde sharalar qabyldaıdy. Sapaly jáne ornyqty ekonomıkalyq ósim teńgerimdi makroekonomıkalyq saıasat, ekonomıkany odan ári ártaraptandyrý, ınvestıtsııalardy targettelgen tartý jáne eksportty proaktıvti ilgeriletý esebinen qamtamasyz etiletin bolady.

Halyqty jumyspen qamtýdy saqtaý jáne ulǵaıtý jónindegi keshendi sharalar iske asyrylady. Jyl saıyn jumyspen qamtýdyń belsendi formalarymen keminde 700 myń adam qamtylatyn bolady. 2025 jylǵa qaraı barlyq kórsetiletin memlekettik qyzmetter avtomattandyrylyp, elektrondy formatqa kóshiriledi. «Jol kartasynyń ázirlengen jobasy «Nur Otan» partııasynyń «Ózgerister joly: árkimge laıyqty ómir!» saılaýaldy baǵdarlamasyn tolyq ári sapaly iske asyrý jónindegi barlyq qajetti sharalardy qamtıdy.

Úkimet barlyq is-sharalardyń ýaqytyly oryndalýyn qamtamasyz etedi. Barlyq sharalardy iske asyrýdyń nátıjesi jańa shynaıylyq jaǵdaıynda halyqtyń turmys sapasy men ál-aýqatynyń naqty artýy bolady», — dedi A. Mamın. Premer-Mınıstr sóz sóılegen soń Úkimet músheleri depýtattardyń «Nur Otan» partııasynyń saılaýaldy baǵdarlamasyn iske asyrýdyń túrli aspektileri týraly suraqtaryna jaýap berdi.