Asqar Mamın mınıstrler men ákimderge naqty tapsyrma berdi
NUR-SULTAN. QazAqparat - Búgin Úkimet otyrysynda QR Premer-Mınıstri Asqar Mamın mınıstrler men ákimderge naqty tapsyrma berdi, dep habarlaıdy QazAqparat tilshisi.
«Jalpy jyldyń qorytyndysy boıynsha jumyspen qamtý máselesi Memleket basshysy Qasym-Jomart Toqaevtyń tóraǵalyǵymen ótetin Úkimettiń keńeıtilgen otyrysynda qaralatyn bolady», - dedi Asqar Mamın.
Osyǵan baılanysty Premer-Mınıstr birqatar mınıstrlik pen ákimderge naqty tapsyrmalar berdi.
«Birinshi - Eńbek jáne halyqty áleýmettik qorǵaý, Ulttyq ekonomıka, Aýyl sharýashylyǵy mınıstrlikteri ákimdiktermen birge barlyq memlekettik baǵdarlamalar boıynsha jumyspen qamtýdy jandandyrýda naqty sharalar qabyldasyn. Ekinshi - óńirlerdiń ákimdikteri birinshi jartyjyldyqtyń qorytyndysy boıynsha memlekettik baǵdarlamalardy, sonyń ishinde «Eńbek» memlekettik baǵdarlamasyn iske asyrýdyń barlyq kórsetkishine qol jetkizýdi qamtamasyz etsin. Úshinshi - Eńbek jáne halyqty áleýmettik qorǵaý mınıstrligi ákimdikterdiń josparlanǵan ındıkatorlarǵa, ásirese azamattardy turaqty jumys oryndaryna ornalastyrý bóliginde qol jetkizgen nátıjelerine sapaly taldaý men monıtorıng júrgizsin. Eraly Luqpanuly, baqylaý ózińizde», - dedi Úkimet basshysy orynbasary Eraly Toǵjanovqa qarata.
