Asqar Mamın Majarstan Premer-Mınıstrimen ınvestıtsııalyq yntymaqtastyqty nyǵaıtý jaıyn talqylady
NUR-SULTAN. QazAqparat - Búgin QR Premer-Mınıstri Asqar Mamın Majarstan Premer-Mınıstri Vıktor Orbanmen kezdesti, dep habarlaıdy QazAqparat primeminister.kz silteme jasap.
«Kezdesýde saýda-ekonomıkalyq, ınvestıtsııalyq yntymaqtastyqty odan ári damytý, ekijaqty taýar aınalymynyń kólemin ulǵaıtý máseleleri talqylandy. Sonymen qatar, dástúrli jáne balamaly energetıka, atom ónerkásibi jáne ǵylym, qorǵanys-ónerkásibi kesheni, avıatsııa, aýyl sharýashylyǵy, qazaqstandyq ekologııalyq taza ónimdi eksporttaý salalaryndaǵy ózara tıimdi yntymaqtastyqty tereńdetý perspektıvalary qaraldy», delingen habarlamada.
Eki eldiń Úkimet basshylarynyń pikirinshe, ekijaqty taýar aınalymynyń qazirgi kólemi yntymaqtastyqtyń úlken áleýeti bar ekenin kórsetedi.
«Biz Qazaqstandy eleýli ekonomıkalyq nátıjelerge qol jetkizip jatqan el dep sanaımyz. Ekijaqty qarym-qatynas ornatqanymyzǵa óte qýanyshtymyz. Majarstan aldaǵy ýaqytta da Qazaqstanǵa ashyq bolyp, ekonomıkalyq yntymaqtastyq múmkindikterin izdeýdi jalǵastyrady», - dedi Majarstan Premer-Mınıstri Vıktor Orban. Ol birlesken jumys keleshekte ekonomıkalyq baılanysty ulǵaıtyp, ózara is-qımyl qurylymyn keńeıtýge jáne aýqymdy jobalardy iske asyrýǵa jol ashatynyna senim bildirdi.
QR Premer-Mınıstri A. Mamın Qazaqstan men Majarstan arasyndaǵy senimdi qarym-qatynastar ekonomıkalyq ózara is-qımyldy damytýǵa qolaıly jaǵdaı jasaıtynyn atap ótti.
«Majarstan - Qazaqstannyń mańyzdy saýda-ekonomıkalyq seriktesi. Eki el arasyndaǵy ózara is-qımyldyń odan ári keńeıe túsýin quptaımyz», - dep A. Mamın, Majarstan kásipkerlerin Qazaqstanda ınvestıtsııalyq jobalardy iske asyrýǵa belsene qatysýǵa jáne ózara is-qımyldy damytýdyń jańa formalaryn birlesip izdeýge shaqyrdy.
Qazaqstan men Majarstannyń Úkimet basshylary eki el arasyndaǵy ózara saýda men ınvestıtsııalyq yntymaqtastyqty keńeıtýge múddeli ekenin rastady. Nur-Sultan qalasynda bıyl 29 sáýirde 100 majar bıznesmeniniń qatysýymen ótetin Qazaqstan-Majarstan Strategııalyq keńesiniń otyrysy saýda kólemin odan ári ulǵaıtýdyń jáne taýar aınalymynyń qurylymyn keńeıtýdiń jańa quraldaryn anyqtaýǵa jol ashady.
