Asqar Mamın Mańǵystaý oblysynyń aktıvine jańa ákimdi tanystyrdy

AQTAÝ. QazAqparat - QR Premer-Mınıstri Asqar Mamın men QR Prezıdenti Ákimshiliginiń basshysy Erlan Qoshanov Mańǵystaý oblystyq máslıhatynyń kezekten tys sessııasyna qatysty, onda óńir ákimi laýazymyna Memleket basshysy Qasym-Jomart Toqaev usynǵan Nurlan Noǵaevtyń kandıdatýrasyna biraýyzdan qoldaý bildirildi, dep habarlaıdy QazAqparat primeminister.kz silteme jasap.

Mańǵystaý oblysynyń aktıvimen ótken keńeste A. Mamın Serikbaı Trumovtyń óńirdi damytýǵa qosqan úlesin atap ótip, oblys basshysy laýazymynda atqarǵan jumysy úshin alǵys aıtty.

Jańa ákimdi tanystyra otyryp, Úkimet basshysy onyń óńirlik jáne respýblıkalyq deńgeıdegi basshylyq laýazymdarda atqarǵan mol eńbek tájirıbesin atap ótti.

«Jańa ákimniń aldyna óńirdiń keshendi áleýmettik-ekonomıkalyq damýy boıynsha mańyzdy mindetter qoıyldy. Memleket basshysy Qasym-Jomart Toqaev Mańǵystaý oblysynyń damýyna erekshe kóńil bóledi. Óńir ónerkásip, energetıka, kólik-logıstıka jáne týrıstik salalarda zor áleýetke ıe», - dedi A. Mamın.

Premer-Mınıstr ınvestıtsııalar tartý, jańa jumys oryndaryn qurý, kásipkerlikti qoldaý, halyqtyń turmys sapasyn jaqsartý jáne tabysyn arttyrý jónindegi mindetterdi sheshýdiń mańyzdylyǵyn atap ótti.