Asqar Mamın legıoner fýtbolshylar aldyndaǵy bereshektiń paıda bolý sebebin aıtty
ASTANA. QazAqparat - Májilis depýtattarynyń resmı saýalyna jaýap bergen QR Premer-mınıstri Asqar Mamın legıoner fýtbolshylar aldyndaǵy bereshektiń paıda bolý sebebin aıtty, dep habarlaıdy QazAqparat tilshisi.
«Qazaqstan Respýblıkasy Bıýdjet kodeksiniń 211-babyna sáıkes jergilikti atqarýshy organdar óz boryshyn óteýdi jáne oǵan qyzmet kórsetýdi jergilikti bıýdjetterde kózdelgen qarajat esebinen ózderi júzege asyrady. Boryshtar fýtbol klýbtaryn bıýdjetteý kezinde jyldyń basynda, sondaı-aq demeýshiler tarapynan az qarjylandyrýǵa baılanysty paıda bolady. Qazirgi ýaqytta jergilikti atqarýshy organdardyń aqparaty boıynsha fýtbolshylar men mamandar aldyndaǵy bereshek ótelgen», - dedi Asqar Mamın.
Úkimet basshysy fýtbol komandalarynyń bıýdjetterin josparlaý men jumsaý jergilikti atqarýshy organdardyń quzyrynda bolǵandyqtan, fýtbol klýbtary qarajatty paıdalaný boıynsha esepti jergilikti organdarǵa usynady.
«Baıandalǵannyń negizinde otandyq fýtboldy damytý tásilderin odan ári ázirleý, sheteldik mamandar men legıonerlerdi tartý, fýtbol salasyn qarjylandyrýdy jetildirý maqsatynda Mádenıet jáne sport mınıstrligi Qazaqstandyq fýtbol federatsııasymen birlesip tıisti jumys júrgizetin bolady jáne ótkizilgen is-sharalar qorytyndysy boıynsha Mádenıet jáne sport mınıstrligi depýtattyq korpýsty qosymsha habardar etedi», - dedi Premer-Mınıstr jaýabynda.
Aıta keteıik, osy jyldyń 23 qańtarynda Májilistiń bir top depýtaty sol kezdegi Premer-mınıstr Baqytjan Saǵyntaevtyń atyna resmı saýal joldap, fýtbol komandalarynyń bıýdjetterin josparlaý men jumsaýdyń negizdiligin tekserýdi, sondaı-aq sheteldikter aldynda paıda bolǵan bereshektiń sebepterin anyqtaýdy usynǵan bolatyn.
Depýtattardyń deregine sáıkes, fýtbol klýbtarynyń oıynshylar aldyndaǵy jalpy qaryzy 9,9 mlrd teńgege jetken. Máselen, Aqmola oblysynyń klýby oıynshylarǵa 2,9 mlrd teńge, Aqtóbe oblysy klýby 1,08 mlrd teńge, Shymkent qalasynyń klýby 4,5 mlrd teńge bolǵan.
