Asqar Mamın Qyzylorda oblysyna jumys saparymen keldi

QYZYLORDA. QazAqparat - Jumys sapary barysynda Qazaqstan Respýblıkasynyń Premer-Mınıstri Asqar Mamın Baıqońyr qalasynyń áleýmettik-ekonomıkalyq damýymen, sonymen qatar, ǵarysh salasyndaǵy Qazaqstan-Reseı taraptarynyń ortaq jobalaryn júzege asyrý barysymen tanysty, dep habarlaıdy QazAqparat Qyzylorda oblysy ákimi baspasóz qyzmetine silteme jasap.

Sondaı-aq, Premer-Mınıstr «Soıýz MS-15» basqarylatyn ǵarysh kemesiniń ushyrylýy sátin tamashalady. Juldyzdy qalashyqta «Nurly jer» memlekettik baǵdarlamasy aıasynda salynǵan turǵyn úılerdi aralap kórip, qalany gazdandyrý jumystarymen tanysty.

Asqar Uzaqbaıulyna Baıqońyr qalasynda atqarylyp jatqan jumystar jaıly Qyzylorda oblysynyń ákimi Qýanyshbek Ysqaqov baıandady.

«Baıqońyr qalasynda «Nurly jer» baǵdarlamasy aıasynda 50 páterli bes úıdiń qurylysy aıaqtaldy. Qurylystyń jalpy aýmaǵy-15,7 myń sharshy metr, munda 250 páter bar. Úıler ortalyq sý jáne káriz júıesine qosylǵan. Jylý jáne ystyq sýmen qamtamasyz etý úshin tabıǵı gazben avtonomdy bý qazandyǵy ornatylǵan. Qazirgi ýaqytta baspana kezeginde turǵan Baıqońyrdaǵy QR azamattaryna páter berilýde», - dedi óńir basshysy.

Aıta keteıik, «Qyzylorda oblysyn gazdandyrý jáne jańa aktıvter qurý» ınvestıtsııalyq jobasyn iske asyrý aıasynda Baıqońyr qalasyn «Beıneý - Shymkent» gaz qubyryna qosý jáne Baıqońyr qalasynyń jetkizýshi gaz qubyry men kvartalishilik gaz taratý jelilerin salý boıynsha jumystar júrgizildi. Búginde qazaqstandyq áleýmettik nysandar men boı kótergen 5 kóp qabatty turǵyn úı gaz jelilerine qosylǵan. Tutynýshylar úshin gaz baǵasy – tekshe metrine 20,90 teńge.

Premer-Mınıstrge «Baıqońyr» kesheninde erkin ekonomıkalyq aımaq qurýǵa baılanysty atqarylyp jatqan jumystar da baıandaldy.

Sodan soń, Asqar Mamın qonaq úı keshenderiniń qurylys barysymen, atap aıtqanda, «Reseı» qonaq úıi men «Nóldik kvartal» qonaq úı keshenin qaıta jańǵyrtý jumystarymen tanysty.

Qazirgi tańda qalanyń oıyn – saýyq-týrıstik áleýetin arttyrý úshin Qyzylorda oblysynyń ákimdigi men Baıqońyr qalasynyń ákimshiligi «Reseı» qonaq úıi men «Nóldik kvartal» nysandaryn jalǵa alý máselesin talqylaýda.

Qyzylorda oblysyna jumys saparynyń sońynda QR Premer – Mınıstri «Soıýz MS-15» basqarylatyn ǵarysh kemesiniń ushyrylý sharasyna qatysty. Ǵaryshqa Oleg Skrıpochka (RF), Djessıka Meır (AQSh) jáne Hazza ál-Mansýrı (BAÁ) attandy.