Asqar Mamın QR Prezıdenti janyndaǵy Sheteldik ınvestorlar keńesiniń aralyq otyrysyn ótkizdi
ShIK-tiń ınvestıtsııalyq saıasatty iske asyrý, energetıka, ekologııa jáne munaı-gaz salasy, eńbek zańnamasy, adamı kapıtaldy damytý jáne sheteldik jumys kúshin tartý, tsıfrlandyrý jónindegi birlesken jumys toptarynyń qyzmeti týraly «Sheteldik ınvestorlardyń qazaqstandyq keńesi» qaýymdastyǵynyń basqarma tóraǵasy, «EY» kompanııasynyń Qazaqstan jáne Ortalyq Azııa boıynsha basqarýshy seriktesi Erlan Dosymbekov, «Total Energies Kazakhstan» basshysy Alem Frıga-Noı, «KNAÝF» kompanııasynyń QR-daǵy ókili Dımıtrı Propp, Qazaqstan jáne Ortalyq Azııadaǵy «KPMG» basqarýshy seriktesi Sáken Jumashev baıandady. Premer-Mınıstrdiń orynbasary – syrtqy ister mınıstri Muhtar Tileýberdi, ulttyq ekonomıka mınıstri Áset Erǵalıev, qarjy mınıstri Erulan Jamaýbaev, eńbek jáne halyqty áleýmettik qorǵaý mınıstri Serik Shápkenov, tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, energetıka mınıstri Maǵzum Myrzaǵalıev, ekologııa, geologııa jáne tabıǵı resýrstar vıtse-mınıstri Ahmetjan Pirimqulov, densaýlyq saqtaý vıtse-mınıstri Jandos Búrkitbaev túsinikteme berdi. Otyrysqa qatysýshylar jahandyq ekonomıkalyq kún tártibin transformatsııalaý jáne onyń baǵytyn pandemııadan keıingi qalpyna keltirýge qaıta baǵdarlaý turǵysynan QR ınvestıtsııalyq saıasatynyń ózekti máselelerin talqylady. Premer-Mınıstr Qazaqstan COVID-19-dyń ekonomıkalyq saldaryn sátti eńsere alǵanyn atap ótti. Bıylǵy 11 aıdyń qorytyndysy boıynsha ekonomıka ósim kórsetip qana qoımaı, sondaı-aq óndiristiń pandemııaǵa deıingi kórsetkishterinen de asyp tústi. Bıylǵy qańtar-qarasha aılarynda JІÓ ósimi 3,8% qurady. Ekonomıkanyń belsendi qalpyna kelýi aıasynda tikeleı sheteldik ınvestıtsııalar aǵynynyń artqany baıqalady. 2021 jyldyń birinshi jartysynda QR ekonomıkasyna salynǵan TShI kólemi 30%-dan astamǵa ulǵaıdy. Sheteldik ınvestıtsııalardyń eń kóp ósimi aqparat jáne baılanys (9,4 ese), turý jáne tamaqtaný salasyndaǵy qyzmetter (66,1%-ǵa), óńdeý ónerkásibi (57,2%-ǵa) sııaqty salalarda baıqalady. Óndirýshi emes sektorlarda negizgi kapıtalǵa salynǵan ınvestıtsııalar 11%-dan astamǵa ósti. Qurylys (2,1 ese), óńdeý ónerkásibi (+50,5%), aýyl sharýashylyǵy (+40,5%) jáne saýda (+34,2%) salalarynda ınvestıtsııanyń qarqyndy óskeni baıqalady. Kóptegen halyqaralyq qarjy uıymdary QR ekonomıkasynyń 2021 jyly 4%-ǵa deıin jáne 2022 jyly 4,5%-ǵa deıin ósýin boljaıdy. Daǵdarystan keıingi qalpyna keltirýdiń basym strategııalyq baǵyttary retinde Úkimet basshysy ekonomıkanyń ónerkásiptik áleýetin arttyrýdy, jahandyq naryqtarǵa keshendi ıntegratsııalanýǵa járdemdesýdi, aýyl sharýashylyǵy áleýetin damytýdy, tsıfrlandyrýdy, ınfraqurylymnyń sapasy men qoljetimdiligin arttyrýdy atady. Premer-Mınıstr ótken jyly QR Prezıdenti janyndaǵy Sheteldik ınvestorlar keńesiniń gaz jaǵýdan bólinetin shyǵaryndylar úshin aıyppul esepteý kezindegi dıskrımınatsııalyq tásildi joıý, sondaı-aq bıznesti salyqtyq quqyq buzýshylyqtar úshin qylmystyq jaýapkershilikke tartý shegin ońtaılandyrý týraly usynystary qoldaý tapqanyn atap ótti. ShIK-pen birlesip jańa ınvestıtsııalyq qural – jer qoınaýyn paıdalaný salasyndaǵy jaqsartylǵan modeldik kelisimshart ázirlendi, munaı-gaz salasynda sheteldik ınvestorlarmen jedel ózara is-qımyl jasaý úshin «bir tereze» qaǵıdaty boıynsha Vedomstvoaralyq front-ofıs quryldy, tsıfrlandyrý máseleleri boıynsha turaqty jumys toby quryldy.
