Asqar Mamın QR Prezıdenti kýbogynyń jeńimpazdary men júldegerlerin marapattady
NUR-SULTAN. QazAqparat – QR Premer-Mınıstri, QR hokkeı federatsııasynyń prezıdenti Asqar Mamın shaıbaly hokkeıden QR Prezıdenti kýbogynyń jeńimpazdary men júldegerlerin marapattady, dep habarlaıdy QazAqparat «Habar 24» telearnasyna silteme jasap.
Buǵan deıin habarlaǵanymyzdaı, elordada shaıbaly hokkeıden QR Prezıdenti kýbogynyń 10-ynshy mereıtoılyq týrnıri aıaqtaldy. Bıyl oǵan QHL Shyǵys konferentsııasynan: Qazannan «Ak bars», Ýfadan «Salavat ıÝlaev», Ekaterınbýrgten «Avtomobılıst», Nıjnekamskiden «Neftehımık» jáne Nur-Sultan qalasynan «Barys» klýbtary qatysty.
Bas júldeni Qazaqstan astanasynyń komandasy jeńip aldy. «Barys» týrnır aıasynda tórt match ótkizip, onyń barlyǵynda qarsylasynan basym tústi. Andreı Skabelkanyń qaramaǵyndaǵy oıynshylar «Ak Barsty» - 6:1, «Neftehımıkti» - 5:3, «Avtomobılısti» - 3:2, «Salavat ıÝlaevty» 2:1 esebimen jeńdi.
Aıta keteıik, QR Prezıdentiniń kýbogy oınatylyp jatqan 10 jylda elordalyq klýb bas júldeni besinshi ret ıelenip otyr. Týrnır qorytyndysy boıynsha ekinshi oryn «Avtomobılıstke», úshinshi oryn «Ak Barsqa» buıyrdy.
Sondaı-aq jeke nomınatsııalar boıynsha úzdik oıynshylar da marapattaldy. Atap aıtsaq, Edýard Paskýale («Barys») – úzdik qaqpashy, Darren Dıts («Barys») – úzdik qorǵaýshy, Rodıon Amırov («Salavat ıÝlaev») – úzdik shabýylshy, Dastın Boıd («Barys») úzdik bombardır tanyldy.
Jeńimpazdar men júldegerlerge marapattardy QR Premer-Mınıstri, QR hokkeı federatsııasynyń prezıdenti Asqar Mamın tapsyrdy.
Qazaqstandyq klýbty týrnırdegi jeńisimen Memleket basshysy Qasym-Jomart Toqaev quttyqtady.
