Asqar Mamın QR Hokkeı federatsııasy prezıdenti laýazymyna qaıta saılandy
ASTANA. QazAqparat - QR Premer-Mınıstriniń birinshi orynbasary Asqar Mamın Qazaqstannyń Shaıbaly hokkeı federatsııasy prezıdenti ornyna úshinshi tórtjyldyq merzimge saılandy, dep habarlady «QazAqparat» HAA tilshisi.
A. Mamınniń kandıdatýrasyna eseptik-saılaý konferentsııasy qatysýshylarynyń barlyǵy bir aýyzdan daýys berdi. Olar onyń basshylyǵymen hokkeı júıeli túrde damyp, barynsha tanymal bolǵanyn atap ótti. Daýys berer aldynda QR birinshi vıtse-premeri QHF maqsattary men mindetterin aıtty.
Ulttyq komanda aldyna álemdik hokkeı elıtasyna oralý jáne ornyǵý mindeti qoıyldy. Aqtaý, Aqtóbe, Taraz, Oral, Shymkent, Qyzylordada muz aıdyndary men modýlder salý, hokkeı balalar-jasóspirimder bólimshesin ashý josparlanýda. Prezıdent áıelder hokkeıiniń geografııasyn keńeıtýge, áıelder komandalary arasynda QR tolyqqandy chempıonatyn ótkizýge nıetti.
Sondaı-aq, Halyqaralyq hokkeı federatsııasyna Qazaqstanda túrli deńgeıdegi álem chempıonattaryn ótkizý usynysyn engizý josparlanýda. Daýys bergennen keıin A. Mamın QR-da hokkeıdi damytý úshin bar kúsh-jigerin salýǵa ýáde berdi, ol qoıylǵan maqsattarǵa jetý úshin birlesip, jumylyp jumys isteý qajettigin aıtty.
Asqar Mamın QHF-ny 2008 jylǵy qazannan bastap basqaryp keledi. 2012 jylǵy qyrkúıekte ekinshi tórtjyldyq merzimge saılandy. 2016 jylǵy qyrkúıekte Qazaqstan Premer-Mınıstriniń birinshi orynbasary bolyp taǵaıyndaldy. 2008 jylǵy sáýirden bastap 2016 jylǵy qyrkúıek aralyǵynda «Qazaqstan Temir Joly» AQ basqardy.
