Asqar Mamın koronavırýsqa qarsy dárilerdiń qoryna revızııa júrgizýdi tapsyrdy
«Epıdemıologııalyq jaǵdaıdy eskerip, óńirlerdegi jaǵdaıdy turaqtandyrý úshin shuǵyl sharalar qabyldaý qajet. Osyǵan baılanysty mynadaı tapsyrma beremin. Birinshi. Densaýlyq saqtaý mınıstrligi ákimdiktermen birge medıtsına uıymdarynyń 1 aqpannan bastap halyqty jappaı vaktsınalaýdy bastaýǵa daıyn bolýyn qamtamasyz etsin. Egý pýnktterinde vaktsınany saqtaýǵa arnalǵan qajetti jabdyq bolýy tıis. Sonymen birge medıtsına qyzmetkerlerin oqytý qajet. Bir apta merzimde egý pýnktteriniń ázirligin jáne vaktsınamen turaqty qamtamasyz etý máselelerin sheshýdi tapsyramyn», - dedi Asqar Mamın Úkimet otyrysynda.
Ekinshiden, Úkimet basshysy óńirlerdiń ákimderine epıdemıologııalyq jaǵdaı nasharlaıtyn bolsa, shekteý sharalaryn qabyldaýdy, halyq pen bıznes sýbektileriniń belgilengen sanıtarııalyq normalaryn qatań saqtaýyn qamtamasyz etýdi tapsyrdy.
«Sonymen qatar bir apta merzimde ınfektsııalyq aýrýhanalar men bastapqy medıtsınalyq-sanıtarııalyq kómek uıymdaryndaǵy jeke qorǵanysh quraldary men koronavırýsqa qarsy dárilerdiń qoryna revızııa júrgizsin. Úshinshi. Іshki ister mınıstrligi ákimdiktermen birge monıtorıng toptarynyń jumysyn kúsheıtsin. Aqparat mınıstrligimen birge túsindirý jumystaryn kúsheıtý qajet. Óńirlerde baqylaý men sanıtarııalyq-epıdemıologııalyq normalardyń qatań saqtalýy qamtamasyz etilsin. Eraly Luqpanuly, jalpy baqylaý sizde», - dedi Asqar Mamın orynbasary Eraly Toǵjanovqa qarata.
