Asqar Mamın Qazaqstandaǵy Reseı elshisimen kezdesti
ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Asqar Mamın Qazaqstandaǵy Reseı Federatsııasynyń Tótenshe jáne Ókiletti elshisi Alekeı Borodavkındi qabyldady, dep habarlaıdy primeminister.kz.
Kezdesý barysynda elderdiń ekijaqty saýda-ekonomıkalyq yntymaqtastyǵyna qatysty máseleler talqylandy. Astanada bıyl mamyr aıynda EAEO mereıtoılyq sammıtin, kúzde Ombyda Qazaqstan men Reseıdiń XVI aımaqaralyq yntymaqtastyq forýmyn ótkizý josparlaryna kóńil bólindi. Budan ózge, «Baıqońyr» kesheni boıynsha ózara is-qımyldyń birlesken ádis-tásilderi, sonyń ishinde Baıqońyr qalasynyń ınfraqurylymyn jańǵyrtý, «Báıterek» jobasyn iske asyrý máseleleri qaraldy.
Búginde EAEO barlyq elderi QR Prezıdenti N. Nazarbaevtyń Eýrazııalyq ıntegratsııa týraly ıdeıasyna 25 jyl jáne Eýrazııalyq ekonomıkalyq odaq týraly kelisimshartqa qol qoıylǵanyna 5 jyl tolýyna oraılastyrylǵan, Astanada EAEO mereıtoılyq sammıtin ótkizý ýaqytynyń tıimdiligin quptady.
Ombyda ótetin Qazaqstan men Reseıdiń XVI aımaqaralyq yntymaqtastyq forýmy aıasynda Reseı tarapy shekara mańy óńirleriniń Jastar forýmyn ótkizýge usynys bildirdi.
A. Borodavkınniń aıtýynsha, 2018 jyl ekijaqty Qazaqstan-Reseı qarym-qatynasy úshin tabysty ári jemisti boldy.
QR Premer-Mınıstri A. Mamın Reseıdiń Qazaqstannyń basty saýda seriktesi ekenin jáne eki el arasyndaǵy yntymaqtastyqtyń qarqyndy túrde jáne barlyq baǵyttarda ilgerilemeli damyp kele jatqanyn atap ótti.
Reseı úlesi Qazaqstannyń syrtqy saýda aınalymynda shamamen 19% quraıdy, qazaqstandyq ónimdi eksporttaý boıynsha 4-orynda. 2018 jyldyń qorytyndysy boıynsha taýar aınalymy 2017 jylmen salystyrǵanda 7,2% ulǵaıyp, $17,6 mlrd qurady, sonyń ishinde eksport - $5,2 mlrd (+11,3%). 2017 jyldyń qorytyndysy boıynsha taýar aınalymynyń ósimi 25,6% quraǵan.
Investıtsııalyq ózara is-qımyldyń joǵary deńgeıi saqtalǵan. QR Ulttyq bankiniń derekteri boıynsha, 2005 jyldan bastap 2018 jylǵy ІІІ toqsan aralyǵynda Reseıden Qazaqstanǵa jınaqtalǵan tikeleı ınvestıtsııalar kólemi $12,9 mlrd qurady. Qazaqstanda Reseı kapıtalynyń qatysýymen 6 myńnan astam kásiporyn tirkelgen, bul QR-daǵy sheteldik kapıtaldyń qatysýymen jumys isteıtin kásiporyndardyń jalpy sanynyń úshten birine jýyq (37%).
