Asqar Mamın Qazaqstandaǵy elektrondyq saýdanyń damýyna boljam jasady
NUR-SULTAN. QazAqparat - 2025 jyly Qazaqstanda elektrondy saýda-sattyq kólemi 2 trln teńgege jetedi. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Elektrondyq kommertsııa - álemdik trend jáne servıstik ekonomıkanyń qarqyndy damyp kele jatqan baǵyttarynyń biri. Sarapshylardyń baǵalýynsha, 2025 jylǵa qaraı elektrondyq kommertsııa 2,8 trln dollarǵa deıin 1,5 esege ósedi. Damyǵan elderdegi elektrondy naryqtyń úlesi, mysaly, Qytaıda - 21, EO-da - 15, AQSh-ta - 10 paıyzdan astam. Boljamdarǵa súıensek, 2025 jylǵa qaraı Qazaqstan ınternet alańdaryndaǵy satyp alý kólemi 153 mlrd teńgeden 2 trln teńgege deıin ósedi. Bul - jalpy bólshek saýdanyń 25 paıyzy. Osyǵan baılanysty elektrondyq saýda ekonomıka úshin qozǵaýshy kúshterdiń biri bolyp tabylady», - dedi ol.
Úkimet basshysynyń aıtýynsha, 2018 jyly elimizde elektrondyq saýda naryǵynda 33 myń jumys orny qurylǵan. Al 2025 jyly 314 myń jańa jumys ornyn ashýǵa múmkindik bar.
«2025 jylǵa qaraı elektrondy saýda-sattyqtyń ekonomıkaǵa tıgizetin mýltıplıkatıvtik áseri JІÓ-ge jyl saıyn qosymsha 1,1 paıyzdyq tarmaq úles qosady dep boljaýǵa bolady. Osy kezeńge deıin avtotasymaldan túsetin kiris kólemin ósirýge jáne Qytaıdan Qazaqstan arqyly Eýropaǵa júk tasymaldaıtyn júk kólikteriniń qarqynyn táýligine 2 myńnan 21 myńǵa deıin arttyrýǵa múmkindik jasalady dep josparlandy. Jalpy, «Batys Qytaı - Batys Eýropa» dáliziniń daıyn ınfraqurylymy konteınerlik tasymaldar jáne logıstıka ósimimen qatar, tasymaldaýshylar úshin úlken áleýeti bar baǵytty ashady», - dedi A.Mamın.
Premer-mınıstr elektrondy saýda otandyq aýyl sharýashylyǵy ónerkásibiniń áleýetin odan ary ósirýge úles qosa alatynyn jáne qazaqstandyq ónimderdiń basqa elder naryǵyna shyǵýyna múmkindik jasaıtynyn basa aıtty.
«Sonyń ishinde Qytaı naryǵyna aýyl sharýashylyǵy ónimderin elektrondyq saýda-sattyq arqyly ótkizý jyl saıyn 20 paıyzǵa ósetin bolady», - dedi Úkimet basshysy.
