Asqar Mamın Qazaqstandaǵy bıznes klımatty jaqsartý sharalaryn jedeldetýdi tapsyrdy
NUR-SULTAN. QazAqparat - Úkimet basshysy Asqar Mamın Ulttyq ekonomıka mınıstrligine 1 shildege deıin «Bızneske arnalǵan Úkimet» jobasyn asyrý jumysyn aıaqtaýdy tapsyrdy, dep habarlaıdy QazAqparat tilshisi.
«Ótken bes jylda bıznes úshin ákimshilik kedergilerdi, ártúrli operatsııalyq shyǵystardy qysqartýǵa baǵyttalǵan jeti zańnamalyq bastamalar toptamasy qabyldandy. Qazir Parlamentte segizinshi túzetýler toptamasy qabyldanyp jatyr. Jalpy bıznesti damytýǵa baǵyttalǵan baǵdarlamalar óziniń tıimdiligin kórsetip otyr», - dedi Asqar Mamın Úkimet otyrysynda.
Úkimet basshysy qabyldanyp jatqan sharalar men baǵdarlamalar azamattardyń kásipkerlik belsendiligin arttyratynyn atap ótti.
«Bıznes klımatty jaqsartý boıynsha sharalar kesheniniń qabyldanýyn tezdetip, osy jyldyń 1 maýsymyna deıin Parlamentte tıisti jumystardy júrgizý qajet. Ulttyq ekonomıka mınıstrligi 1 shildege deıin «Bızneske arnalǵan Úkimet» jobasyn asyrý jumysyn aıaqtasyn. Bul kásipkerlerdiń biryńǵaı tereze arqyly memlekettik qoldaý alý rásimderin jeńildetedi», - dedi ol.
Úkimet basshysy bul máseleni baqylaýdy óziniń orynbasary Álıhan Smaıvovqa tapsyrdy.
