Asqar Mamın Qazaqstan hokkeı federatsııasynyń prezıdenti bolyp qaıta saılandy
NUR-SULTAN. QazAqparat - Nur-Sultan qalasynda Qazaqstan hokkeı federatsııasynyń (QHF) XIV respýblıkalyq konferentsııasy ótti. Shara barysynda Asqar Mamın Qazaqstan hokkeı federatsııasynyń prezıdenti bolyp qaıta saılandy, dep habarlaıdy QazAqparat federatsııa aqparatyna silteme jasap.
Konferentsııaǵa Atqarý komıtetiniń músheleri, óńirlik fılıaldardyń, hokkeı klýbtarynyń jáne Balalar-jasóspirimder sport mektepteriniń basshylary qatysty.
Sharada QHF prezıdentiniń 2016-2021 jyldar aralyǵyndaǵy jumysy týraly esebi, federatsııanyń jarǵysy men erejesi, shtattyq qurylymy qaraldy, basqarý jáne baqylaý organdarynyń saılaýy ótkizildi. Konferentsııa qatysýshylarynyń biraýyzdy sheshimimen Asqar Mamın Qazaqstan hokkeı federatsııasynyń prezıdenti laýazymyna qaıta saılandy.
A. Mamın óz sózinde qazirgi ýaqytta erler arasyndaǵy Qazaqstan komandasy álemdik reıtıngide 19-dan 13-orynǵa kóterilgenin atap ótti. Osy ýaqyt ishinde qazaqstandyq qurama komandalar 19 álem chempıonatyna, Qysqy Azııa oıyndaryna, eki qysqy Dúnıejúzilik Ýnıversıadaǵa, olımpıada irikteý týrnırlerine qatysyp, 14 medal jıyntyǵyn jeńip aldy.
QHF prezıdenti hokkeı lıgalarynyń, onyń ishinde jastar, áıelder jáne áýesqoı lıgalardyń joǵary damý qarqynyn, chempıondyq tıtýl men Qazaqstan Respýblıkasynyń Kýbogy úshin básekelestiktiń artqanyn atap ótti.
Balalar men jasóspirimder hokkeıiniń damýyndaǵy oń dınamıkanyń artyp kele jatqany baıqalady. Respýblıkada 30 hokkeı mektebi bar, olarda 269 jattyqtyrýshy jumys isteıdi. Komandalar men oıyndardyń sany ulǵaıyp keledi. Ótken kezeńmen salystyrǵanda hokkeımen aınalysatyn balalar sany 32% – 7,3 myńnan astamǵa ósti.
Búginde QR-da 34 jabyq muz arenasy men modýlderi bar. Jaqyn arada Pavlodar qalasynda muz modýlin jáne Qostanaı qalasynda muz arenasyn ashý josparda bar.
2022 jylǵy qańtarda hokkeıshilerdi daıarlaıtyn «JAS NOMAD» respýblıkalyq baǵdarlamasynyń birinshi blogyn jáne Salem Hokei jobasyn iske qosý josparlanǵan. Onyń maqsaty – balalardy sportqa tartý. Búginde saıt, mobıldik qosymsha ázirlendi, kıim-keshek pen qural-jabdyqtar satyp alyndy. Olar Demalys kúngi hokkeı jobasyna qatysatyn hokkeı mektepterine beriledi.
Aldaǵy kezeńde Federatsııa óńirlerde hokkeıdi damytý, BJSM-nen bastap Jastar hokkeıi men Kásibı hokkeıge deıin hokkeıshilerdi daıarlaýdyń tolyqqandy klýbtyq júıesin qurý, áıelder hokkeıiniń geografııasyn keńeıtý, óńirlerde jańa hokkeı mektepteriniń, Qyzylorda, Shymkent, Atyraý jáne Aqtaýda jastar hokkeı klýbtarynyń, Oralda kásibı klýbtyń ashylýyna járdemdesý jónindegi jumysty kúsheıtedi.
