Asqar Mamın: Qazaqstan – Azııa men Eýropa arasyndaǵy tranzıttik kópir

ALMATY. QazAqparat – Qazaqstan – Azııa men Eýropa arasyndaǵy tranzıttik kópir. Bul týraly QR Premer-Mınıstri Asqar Mamınniń Almatyda ashylǵan TransLogistica Kazakhstan-2021 halyqaralyq kórmesiniń qatysýshylaryna joldaǵan quttyqtaýynda aıtyldy, dep habarlaıdy QazAqparat.

«Qazaqstan Eýrazııa qurlyǵynyń mańyzdy kólik jelileriniń ortasynda ornalasa otyryp, Azııa men Eýropa arasyndaǵy tranzıttik kópir men senimdi seriktesti bildiredi, muny kórme men konferentsııaǵa qatysýshylardyń halyqaralyq quramy dáleldeıdi.

«Translogistica Kazakhstan 2021» halyqaralyq kórmesi tranzıttik-kólik áleýetin damytýǵa, uzaq merzimdi jáne ózara tıimdi seriktestik qatynastardy odan ári nyǵaıtýǵa úles qosatynyna senimdimin», - dep Úkimet basshysynyń quttyqtaýyn oqyp berdi QR Indýstrııa jáne ınfraqurylymdyq damý vıtse-mınıstri Berik Kamalıev.

Vıtse-mınıstr óz sózinde sońǵy 15 jylda Qazaqstannyń kólik salasyna 35 mlrd AQSh dollaryna jýyq qarajat salynǵanyn aıtyp ótti.

«Qazaqstan kólik salasyn jáne kólik dálizderiniń tranzıttik áleýetin damytý úshin zor kúsh-jiger jumsaýda. Úkimet pen QR IIDM birqatar salalyq baǵdarlamalardy iske asyrdy, salanyń quqyqtyq negizi qalyptasty, kólik qyzmetterin kórsetý úshin qolaıly básekelestik orta quryldy. Sońǵy 15 jylda elimizdiń kólik salasyna shamamen 35 mlrd AQSh dollary salyndy», - dep atap ótti ol.

Onyń aıtýynsha, búginde Qazaqstan arqyly 11 halyqaralyq tranzıttik dáliz ótedi (5 temir jol jáne 6 avto). Respýblıkalyq, oblystyq jáne aýdandyq mańyzy bar avtomobıl joldarynyń jalpy uzyndyǵy shamamen 100 myń km quraıdy. Temir joldyń uzyndyǵy – 21 myń km.

Qazaqstanda 20 áýejaı bar, onyń 18-i Azamattyq avıatsııanyń halyqaralyq uıymy (IKAO) talaptaryna sáıkes keledi.

Aǵymdaǵy jylǵy 2-11 tamyz aralyǵynda ótkizilgen ICVM sheńberinde IKAO ushý qaýipsizdiginiń halyqaralyq standarttaryna sáıkestik deńgeıi (84% - ǵa deıin) arttyryldy. IKAO-nyń obektıvti baǵalaýy QR IIDM júrgizetin reformalardyń oń áserin kórsetedi.