Asqar Mamın qazaq-ózbek shekarasyndaǵy keden beketterin aralap kórdi
Astanalyq qonaqtar shekara boıyndaǵy «Jibek joly» baqylap ótkizý beketiniń jumysymen tanysty. Sodan keıin qazaqstandyq delegatsııa Ózbekstan Respýblıkasy Premer-Mınıstriniń birinshi orynbasary Achılbaı Ramatov bastaǵan delegatsııamen kezdesti. Taraptar júkterdi óńdeý ýaqyty men azamattardyń shekaradan ótý protsesin ońtaılandyrý jáne eki el arasyndaǵy ózara tıimdi saýda - ekonomıkalyq taýar aınalymyn arttyrý múmkindigin qarastyrý jaıyn talqylady.
Aıta keteıik, eki el arasyndaǵy ekonomıkalyq áriptestik qarym - qatynas ýaqyt ótken saıyn nyǵaıyp keledi. Sondaı-aq, shekaradaǵy alys - beris, barys -kelistiń de kórsetkishi ulǵaıa túsken. Máselen, 2017 jyldyń 5 aıynda «Jibek joly» baqylap ótkizý beketinnen 2,4 mıllıonnan astam jeke tulǵa shekara assa, bıylǵy jyldyń sáıkes kezeńinde kórsetkish 4,2 mıllıonǵa jetken.
Al, ótken jyly 9277 jeńil avtokólik ótken bolsa, aǵymdaǵy jyly 34915-ke jýyqtaǵan. Odan bólek, jyl basynan beri jolaýshylar tasymalymen aınalysatyn baǵyttar iske qosylyp, nátıjesinde 1283 avtobýs Qazaqstan aýmaǵyna kelip ketken.
