Asqar Mamın Katar Premer-Mınıstriniń orynbasarymen kelissózder ótkizdi

NUR-SULTAN. QazAqparat – QR Premer-Mınıstri Asqar Mamın Katar Premer-Mınıstriniń orynbasary Hamad bın Abdýlazız ál-Kavarımen kelissózder ótkizdi, primeminister.kz.

«Katar ‒ Qazaqstannyń arab álemindegi mańyzdy saıası seriktesi. Bizdiń elderimiz arasynda Qazaqstannyń Tuńǵysh Prezıdenti ‒ Elbasy N. Nazarbaev pen Katardyń joǵary basshylyǵy negizin salǵan senimdi ári ashyq saıası dıalog ornaǵan. Memleket basshysy Q.Toqaev syrtqy saıasattaǵy sabaqtastyqty ustana otyryp, Katarmen yntymaqtastyqty damytýǵa úlken mán beredi», — dedi A. Mamın.

Úkimet basshysy saýda-ekonomıkalyq, ınvestıtsııalyq, mádenı-gýmanıtarlyq jáne basqa da salalardaǵy yntymaqtastyqty arttyrý úshin úlken áleýettiń bar ekenin atap ótti.

Elder arasynda vızasyz rejım ornaǵan, osy jyldyń jeltoqsan aıynda Nur-Sultan men Doha arasynda tikeleı reıster ashylady dep josparlanýda. Aldaǵy ýaqytta turaqty reıster aptasyna 7 ret tek astanalar arasynda ǵana emes, sonymen qatar Almaty men Doha arasynda da ashylmaq, sondaı-aq, Qazaqstanda engizilgen ashyq aspan rejımi aıasynda «áýe erkindiginiń» besinshi dárejesimen aptasyna 7 júk reısi oryndalatyn bolady.

Taraptar týrızm, kólik, densaýlyq saqtaý, bilim berý jáne basqa da salalardaǵy ekijaqty yntymaqtastyqtyń perspektıvalaryn talqylady.