Asqar Mamın Investıtsııalyq shtab otyrysyn ótkizdi
Ulttyq ekonomıka mınıstri Áset Erǵalıev osy jyldyń 4 aıynda taý-ken óndirisi ónerkásibin esepke qospaǵanda, negizgi kapıtalǵa salynǵan ınvestıtsııalar kólemi 32,3% deńgeıinde ósim kórsetkenin aıtty.
Mınıstr QR ekonomıkasynyń qalpyna kelý traektorııasyna shyǵýy aıasynda osy jyldyń 4 aıynyń nátıjeleri boıynsha negizgi kapıtalǵa salynǵan ınvestıtsııalar ósiminiń joǵary qarqyny óńdeý ónerkásibinde (112,8%), aýyl sharýashylyǵynda (66,1%) jáne qurylysta (72,4%) baıqalǵanyn atap ótti. Ulttyq ekonomıkany qalpyna keltirýdiń mańyzdy faktorlarynyń biri qyzmet kórsetý sektoryndaǵy kórsetkishter boldy. Bıylǵy qańtar-sáýir aılarynyń nátıjeleri boıynsha sońǵy 12 aıda alǵash ret kórsetiletin qyzmetter sektoryndaǵy ósý qarqyny oń dınamıka kórsetti.
Kórsetilgen dınamıka aıasynda negizgi kapıtalǵa salynǵan ınvestıtsııalar aǵynynyń joǵary qarqyny saýda (28,3%), kólik jáne qoımalaý (27,6%), qarjy jáne saqtandyrý qyzmeti (28,6%), jyljymaıtyn múlik operatsııalary (27,5%), bilim berý (10,3%), óner, oıyn-saýyq jáne demalys (30,9%), sondaı-aq aqparat jáne baılanys (61,2%) sekildi salalarda baıqaldy.
Negizgi kapıtalǵa salynǵan ınvestıtsııalar boıynsha oń ósim qarqynyna 15 óńirde jáne respýblıkalyq mańyzy bar qalalarda qol jetkizildi.
Kósh bastap turǵan óńirler — Almaty qalasy (+47,9%) jáne Nur-Sultan qalasy (+31,7%), Túrkistan (+42,6%), Jambyl (+30,4%), Qaraǵandy (+22,9%), Soltústik Qazaqstan (+16,7%) Qostanaı (+11,6%) jáne Qyzylorda (+6,1%) oblystary. Batys Qazaqstan (-40,2%) jáne Atyraý (-37,8%) oblystarynda artta qalýshylyq baıqalady. Álemdegi kapıtal naryǵynyń qalpyna kelý serpinin jáne ulttyq ekonomıkanyń ınvestıtsııalyq tartymdylyǵynyń ósýin eskere otyryp, bıyl tikeleı sheteldik ınvestıtsııalardyń jalpy aǵynynyń 11% deńgeıinde — $19 mlrd deıin ósýin qamtamasyz etý josparlanýda.
Otyrysta «Samuryq-Qazyna» AQ ınvestıtsııalyq jobalarynyń pýly qaraldy. «Samuryq-Qazyna» AQ basqarma tóraǵasy Almasadam Sátqalıev 31.12.2020 jylǵy jaǵdaı boıynsha «Samuryq-Qazyna» AQ ınvestıtsııalyq portfeli seriktesterdiń úlesterin eskere otyryp, quny 73 trln teńge bolatyn 203 jobadan turatynyn atap ótti. Qazirgi tańda memlekettik jáne salalyq baǵdarlamalar aıasynda Atyraý qalasynda polıpropılen óndirý jónindegi ıntegratsııalanǵan gaz-hımııa kesheniniń, «Beıneý – Bozoı – Shymkent» gaz qubyrynyń, «UIMT» AEA ınfraqurylymy obektileriniń qurylysy, Ekibastuz GRES-1-niń 1-blogyn qalpyna keltirý, «Bogatyr» razrezinde kómir óndirý, tasymaldaý, ortashalaý jáne tıeý tehnologııasyn jańǵyrtý, Shelek dálizinde JES salý tárizdi iri ınvestıtsııalyq jobalar iske asyrylýda. 2021-2026 jyldar kezeńinde Qor Mańǵystaý oblysynyń magıstraldyq gaz qubyrlaryn jańǵyrtý, Almaty energııa keshenin gazdandyrý, Ekibastuz GRES-2 keńe ıtý jáne qaıta jóndeý, JEK salasyndaǵy jobalar jáne t. b. boıynsha ınfraqurylymdyq jobalardy iske asyrýdy kózdeıdi. Ulttyq ekonomıkanyń qurylys materıaldaryndaǵy ózindik jetkiliktiligin qamtamasyz etý jónindegi sharalar aıasynda sanfaıans, jylylaǵysh, qysh taqtaısha, eden jabyndary jáne t. b. óndiretin zaýyttar salý sııaqty ınvestıtsııalyq jobalardy iske asyrý josparlanyp otyr.
«Josparlanǵan ınvestıtsııalyq jobalardy iske asyrý jáne ınvestıtsııa tartý kólemin odan ári arttyrý úshin túbegeıli sharalar qabyldaý qajet. «Samuryq-Qazyna» qory energetıka, munaı-gaz hımııasy, kólik jáne logıstıka jáne basqa da strategııalyq salalardaǵy iri jobalarǵa ınvestıtsııa salýǵa nazar aýdarýy tıis, bul ekonomıkanyń damýyna mýltıplıkatıvti áserin tıgizedi», — dedi A. Mamın.
Otyrysta jergilikti atqarýshy organdar úshin 2021-2025 jyldarǵa arnalǵan tikeleı sheteldik ınvestıtsııalardy tartý jónindegi nysanaly ındıkatorlar bekitildi.
