Asqar Mamın: Investıtsııalyq saıasatqa jańa tásilder engizilýde
«Investıtsııalar - bizdiń ekonomıkanyń damýy men ósiminiń irgeli faktory bolyp qala beredi. Táýelsizdik alǵan jyldardan beri Qazaqstan ekonomıkasyna 300 mlrd dollar ınvestıtsııa tartylǵan. Bizdiń bul jetistikterimiz - aımaqtaǵy básekege qabiletti ári iri ekonomıkaǵa ıe bolýǵa múmkindik berdi. JІÓ ótken jyly 4 paıyzǵa ósti. Syrtqy saýda 20 paıyzǵa artyp, onyń áseri eksport kólemin 26 paıyzǵa arttyrýǵa septigin tıgizdi. Osy qarqyndy saqtaı alsaq, jyldyń sońyna deıin ekonomıkalyq aınalym 100 mlrd dollarǵa jetip qalýy kerek», - deıdi Úkimet basshysy AEF aıasynda elordada ótken Jahandyq ınvestıtsııa boıynsha ótip jatqan dóńgelek ústelde.
Asqar Mamınniń aıtýyna qaraǵanda, 2018 jyly ǵana Qazaqstanǵa 24 mlrd dollar sheteldik kapıtal quıylǵan. Bul Ortalyq Azııaǵa salynǵan tikeleı ınvestıtsııanyń 90 paıyzyna teń ekenin atap ótý kerek.
«Investıtsııalar men negizi kapıtal da birshama ósimdi kórsetip, 20 paıyzǵa nemese 30 mlrd dolllarǵa artty. Osy dınamıkany saqtaı bilý úshin álemdik jaǵdaılardy eskere otyryp, halyqaralyq kapıtaldyń kóptep quıylýy úshin birshama shara qabyldaý kerektigin túsinip otyrmyz. Mine, osy máselelerdi esepke ala otyryp, ınvestıtsııalyq saıasatqa jańa tásil engizdik. Ol amaldar áleýetti ınvestorlardy jan-jaqty qoldaýǵa negizdelgen», - deıdi ol.
Úkimet basshysy óz sózinde «Astana» halyqaralyq qarjy ortalyǵy sheteldik tikeleı ınvestıtsııalardy tartýda sheshýshi rólge ıe bolatynyn tilge tıek etti.
«Biz qalyptastyryp otyrǵan qarjylyq jáne ınvestıtsııalyq ekojúıe Qazaqstandy aımaqtyq jáne halyqaralyq qarjylyq ortalyq etýge jol ashary daýsyz. Shıkizattyq emes sektorǵa ınvestıtsııa salý júıesin jeńildetý úshin biz Sheteldik tikeleı ınvestıtsııalar qoryn qurdyq. 1 mlrd dollarlyq kapıtalızatsııamen qor qarjylyq resýrstaryn keleshegi mol eksporttyq salalarǵa baǵyttaı otyryp, jergilikti naryqtaǵy aktsııalardyń damýyna negiz bolady», - deıdi Asqan Mamın.
