Asqar Mamın IAAF prezıdentimen kezdesti
NUR-SULTAN. QazAqparat - 2 jeltoqsan kúni QR Premer-Mınıstri Asqar Mamın Halyqaralyq jeńil atletıka federatsııalary qaýymdastyǵynyń prezıdenti lord Sebastıan Nıýbold Koe bastaǵan delegatsııany qabyldady, dep habarlaıdy primeminister.kz.
«Sporttyń, onyń ishinde jeńil atletıkanyń tanymaldylyǵyn arttyrý bizdiń saıasatymyzdyń mańyzdy baǵyty. Qazaqstanda 7 ozyq jeńil atletıka ortalyǵynyń qurylysy júrip jatyr - Nur-Sultanda, Almatyda, Pavlodarda, Aqtóbede, Taldyqorǵanda, Atyraýda jáne Óskemende. Bul osy sport túriniń odan ári taralýyna yqpal etetin bolady», - dedi A. Mamın.
Búginde 20 myńnan astam qazaqstandyq jeńil atletıkamen aınalysady, onyń ishinde 11 myńy balalar men jasóspirimderge arnalǵan sport mektepterinde oqıdy, 600-den astamy kásibı sportpen shuǵyldanady. Qazaqstan 1993 jyldan beri Halyqaralyq jeńil atletıka federatsııalary qaýymdastyǵynyń (IAAF) múshesi. Qazaqstandyq sportshylar 20-dan asa marapat ıelendi, onyń ishinde 2000 jyly Sıdneıde altyn medalǵa (Olga Shıshıgına) jáne 2012 jyly Londonda altyn medalǵa (Olga Rypakova) ıe boldy.
Taraptar bilikti jattyqtyrýshylar personalyn daıarlaýda, jeńil atletıkany buqaralyq sport túri retinde tanytýǵa jáne balalar arasynda jeńil atletıkadan jarystar ótkizýde yntymaqtastyq perspektıvalaryn talqylady.
Kezdesýge Qazaqstannyń Ulttyq Olımpıada komıtetiniń prezıdenti T. Qulybaev, Mádenıet jáne sport mınıstri A. Raıymqulova, QR Jeńil atletıka federatsııasynyń prezıdenti D. Ahmetov, jeńil atletıkadan Olımpıada chempıondary O. Shıshıgına jáne O. Rypakova qatysty.
