Asqar Mamın Frantsııanyń ekonomıka mınıstrimen ınvestıtsııalyq yntymaqtastyqty talqylady
NUR-SULTAN. QazAqparat - QR Premer-Mınıstri Asqar Mamın Frantsııanyń ekonomıka jáne qarjy mınıstri Brýno Le Mermen kezdesti, dep habarlaıdy QazAqparat primeminister.kz saıtyna silteme jasap.
Kelissózder barysynda Qazaqstan men Frantsııa arasyndaǵy saýda-ekonomıkalyq jáne ınvestıtsııalyq yntymaqtastyqtyń ózekti máseleleri men keleshegi talqylandy.
«Frantsııa – Eýropalyq odaqtaǵy basty saýda-ekonomıkalyq seriktes», — degen Asqar Mamın, QR Tuńǵysh Prezıdenti – Elbasy N. Nazarbaev pen Frantsııa Prezıdenti E. Makron Brıýsselde 2018 jyldyń qazan aıynda ótken «ASEM» sammıti aıasynda belgilegen saýda-ekonomıkalyq kún tártibin iske asyrýdyń mańyzdylyǵyn atap ótti.
Frantsııa Qazaqstan ekonomıkasyna salynǵan tikeleı ınvestıtsııalar kólemi boıynsha alǵashqy bes eldiń qataryna kiredi. 2005 jyldan bastap 2018 jylǵa deıin Frantsııanyń Qazaqstan ekonomıkasyna qarjy salymynyń kólemi 15 mlrd dollardan asty. 2018 jyldyń qorytyndysy boıynsha taýar aınalymy 32,5% nemese 4,5 mlrd dollarǵa ósti.
Qazirgi tańda kóliktik mashına jasaý, qurylys materıaldaryn, dári-dármekter, azyq-túlik ónimderin shyǵarý salasynda birlesken óndiris sátti jumys istep tur. Energetıka, ǵarysh salalarynda, jańartylatyn qýat kózderi, ınfraqurylymdy damytý, Smart sity jobalary boıynsha birlesken jumys júrgizilip jatyr.
Qazaqstanda frantsýz kapıtalynyń qatysýymen, joǵary tehnologııalyq jobalardy júzege asyratyn «Total», «Orano», «Danon», «Vıkat», «Pejo», «Alstom» sekildi 130-dan astam kásiporyn jumys isteıdi.
Qazaqstan Premer-Mınıstri ınvestıtsııalyq yntymaqtastyqty odan ári damytýǵa, kólik ınfraqurylymy, tsıfrlyq tehnologııalar, adamı kapıtal salalaryndaǵy birlesken jobalardy júzege asyrýǵa qyzyǵýshylyq bar ekenin jetkizdi.
«Bizde aýyl sharýashylyǵynda úlken áleýet bar. Frantsýzdyq Danone, Lactalis jáne Soufllet kompanııalarymen birlesken jobalardy tabysty iske asyrylǵan jobalar dep aıtýǵa bolady. Qazaqstan – ekologııalyq taza ónimdi óndirý jáne EAEO men QHR elderiniń syıymdy naryqtaryna shyǵý turǵysynan bıznes júrgizý úshin perspektıvaly oryn», — dedi Asqar Mamın.
Frantsýz ınvestorlaryna birlesken óndiris oryndaryn ashýda, ımportty almastyrýda jáne agroónerkásiptik ónimderdi odan ári eksporttaýda jan-jaqty kómek kórsetiledi.
«Qazaqstan – Frantsııanyń Ortalyq Azııadaǵy jetekshi seriktesi», — degen Frantsııanyń ekonomıka jáne qarjy mınıstri B. Le Mer, frantsýz tarapynyń QR Tuńǵysh Prezıdenti —Elbasy N. Nazarbaev ashqan jáne Frantsııa Prezıdenti E. Makron rastaǵan strategııalyq yntymaqtastyqty jalǵastyrýǵa daıyn ekenin atap ótti.
B. Le Mer Qazaqstan men Frantsııanyń saýda-ekonomıkalyq, ınvestıtsııalyq, ındýstrııalyq salalardaǵy yntymaqtastyq perspektıvalaryn eskere otyryp, yntymaqtastyqtyń jańa deńgeıine ótýi úshin barlyq múmkindikteri bar dep esepteıdi.
QR Premer-Mınıstri Asqar Mamın men Frantsııanyń ekonomıka jáne qarjy mınıstri Brıýno Le Mer «Samuryq-Qazyna» UÁQ» AQ men «Bpifrance» ınvestıtsııalyq kompanııasy arasyndaǵy birlesken ınvestıtsııalaý týraly, QR Energetıka mınıstrligi, «QazMunaıGaz» UK» AQ jáne «Total» kompanııasy arasyndaǵy tsıfrlyq tehnologııalar salasyndaǵy memorandýmdarǵa qol qoıý rásimine qatysty.
